Muqdisho (Caasimada Online) – Ra’isul wasaaraha xukuumada Somalia Xasan Cali Kheyre, ayaa digniin kasoo saaray isqab qabsi soo kala dhexgala Hay’adda sharci dajinta iyo xukuumada xili uu kawaramayey shaqooyinka horyaala dowladda cusub.
Kheyre waxa uu sheegay in Dowlada cusub ay nasiib darro u noqon doonto haddii ay dhacdo isqabqabsi dhexmara isla Dowlada waxa uuna ka digay in la maqlo dhibaatooyin ka dhextaagan Hay’adaha iyo Xukuumada.
Kheyre waxa uu sheegay in Dowlada Somalia aysan u dulqaadan doonin khilaaf iyo is qabqabsi waxa uuna taa bedelkeeda sheegay inay fududaha in shaqsiyaadkaasi ay shaqadooda ka tagaan inta aysan carqalad iyo sumcad xumi u abuuri lahaayen Dowlada.
Ra’isul wasaaraha waxa uu sheegay in Isqabqabsiga iyo Musuqaba uusan waxba is dhaamin waxa uuna cadeeyay inay aaminsan yihiin labaduba ay ragaadiyeen Dowladnimada.
Ra’isul wasaaraha ayaa sheegay inaan loo baahneen hada waxyaabaha qaar sida muran yimaada inta ay socoto shaqada,si loo gaaro halka la’hiigsanayo.
Kheyre ayaa ku baaqay inuu yimaado la xisaabtan dhab ah si loo fuliyo shaqooyinka horyaala xukuumadiisa oo uu tilmaamay inuu wax badan qaban doono oo ay ugu horeyso wax ka qabashada Abaarta.
Dhinaca kale, Xukuumada imaan doonta ayuu sheegay in sababta loo doortay ay tahay inay ka fogaadan khilaaf waxa uuna sheegay inaan looga aamusi doonin khaladaadkooda.
Caasimada Online
Xafiiska Muqdisho
[email protected]