Addis Ababa (Caasimada Online) Kulamo xasaasi ah ayaa xalay waxa ay dhaceen hotel ku yaalla magaalada Addis-Ababa, xili wadda hadallada DF iyo Jubaland ay gebo gebo ku dhow yihiin, waxaana kulamadaas looga hadlay sidii qodobada dhiman la isugu afgaran lahaa.
Wariyaha Shabakadda Caasimada Online ee dalka Ethiopia, ayaa soo sheegaya in kulanka uu qabtay wasiirka arrimaha dibedda Ethiopia Dr.Tedros Adhanom oo ah nin kaliye ee shirkan doonayay in uu dhaco, ayada oo hadda Ethiopia ay si toos ah usoo fara gelisay wada hadallada.
Shirka wafdiga dowladda waxaa hoggaaminayay wasiiru dowlaha madaxtooyada Faarax Cabduqaadir, sidoo kale waxaa ku wehliyay danjirayaasha Soomaaliya u fadhiyay Addis Ababa iyo London Axmed Cabdisalaan Xaaji Aadan iyo Cabdulaahi Sambaloolshe iyo xubno xidlhibaanno oo ka soo jeeda gobalada Jubbooyinka iyo Gedo. Wasiirka arrimaha gudaha iyo Amniga qaranka ayaa sidoo kale wada hadallada ku biiray shalay.
Wararka ayaa sheegaya in sababta Guuleed u tagay shirka ay tahay xoojinta waftiga dowladda oo u muuqday kuwa sameynayey tanaasul badan.
Dhinaca Axmed Madoobe waxaa madasha u fadhiyay rag uu ku ka mid yahay ku-xigeenkiisa Cabdulaahi Sheekh Ismaacil, ra’iisalwasaarihii hore Cumar Cabdi Rashiid iyo Prof Gaandhi oo horrey u soo noqday wasiirka difaaca Somalia.
Inta badan kulankii xaley waxaa diirada lagu saaray sida iyo xilliga lagu dhawaaqayo qoddobada heshiiska oo inta badan la isku raacay iyo dhameystirka kuwa harsan.
Sidoo kale wararka aan la heleyno Addis Ababa waxa ay sheegayaan in marka lagu dhawaaqo shirka in dowladda Soomaaliya ay magaalada Muqdisho ka hor inta aysan ku qaban shirka Jubbooyinka iyo Gedo, ay ku casuumi doontaa Axmed Madoobe oo madax u ah mid ka mid garabyada isku haya Kismaayo.
Heshiiska ilaa hadda lama saxiixin xaley oo dhan waxaa laga arrinsanayay in la saxiixo dabadeedna saxaafadda si rasmi ah loogu bandhiggo, marka qodobada harsan la isku afgarto.
Waxaa jira warar sheegaya in cadaadis xooggan la saarayo dowladda Somalia, oo inta badan ah tan diidan qodobada harsan ee shirka geba gebadiisa ay u xayiran yihiin, ayada oo cadaadiskaasna uu ka imanayo beesha caalamka.
Dowladda Ethiopia ayaa la rumeysan yahay inay ku ra’yi tahay Kenya marka ay timaado arrinta Jubaland, waxaana muuqata in labadoodaba ay beesha caalamka taageero ka helayaan.
Waxaa tani caddeyn u ah in inta badan ay dowladda Somalia ay tahay tan ka tanaasushay dhowr qodob, haddana weli lagu qasabayo inay sii sameyso tanaasul dheeri ah, oo ay ka mid yihiin inaan la beddelin magaca Jubaland, arrinta dekedda iyo garoonka diyaaradaha Kismaayo iyo madaxweyne ku xigeenka Jubaland.
Qodobada ilaa hadda heshiiska laga gaaray ayaa waxaa ka mid ah
1 – Dowladda oo si buuxda u aqoonsatay maamulka Axmed Madoobe
2 – Dowladda ay ergo ku yeelato dhammeestirka maamulka uu hoggaamiyo Axmed Madoobe.
3 – In Muqdisho lagu qabto shir dib u heshiisiin beelaha dega gobollada Jubaland
Wixii warar ah ee nagu soo kordha, akhristayaasheena naga suga yaan la fogaan in shaa allah.
Caasimada Online
Xafiiska Wararka Nairobi