Maansadan waa maanso aan ku cabbirayo kala fogaanshaha aragtida Madaxweyne Xasan Shiikh Maxamuud iyo Madaxa Maamul Goboleedka Puntland Cabdiraxmaan Maxamed Faroole, Maansadan ayaa ah mid qaab maamuurin ama curis ah u samaysan oo aan kaga hadlinayo labada mudane mid weliba mawqifka uu ka taagan yahay kan kale. Haddaba ka bogasho wacan.
Xasan Shiikh.
Indhaweydba Miinleey
Maan curinnin maansoo
Murtideeda waan dhigay
Mashquul aawadiisiyo
Masuuliyadda igu raran.
Bal aan mariyo maantoo
Galo moosinkeediyo
Minankeeda Suugaan.
Waa mid iga su’aalee
Maqla oo ka miirsada
Muudsada macaankiyo
Miisaanka sheekada
Ha masuugin abidkaa
Adigoon macnaha garan
Minka iyo ujeedada.
Magaca iyo madaxnimo
Midna maanan xoogine
Waa martabad Ilaahay
Ila maagay anigoo
Iyadoo la mudan yahay
Raggu wada majilan yahay
Sawnigii mudh soo idhi
Ma cidbaan ka xoogoo
Madfaciyo rasaasiyo
masaakiin miyaan dilay?
Miyaan qixiyey maatida
Maxaa lay mucaaradi?
Mayada iyo murankiyo
Xaqa loo maldahayaa?.
Faroole:
Miinleeyada maansiyo
Geeraar muc weynliyo
Aan mariyo suugaan
Dadku wada maqsuudaan.
Maqaloo warkaygoo
Madaxweyne ila dhugo
Mar haddaabad Maandeeq
Muftaaxeeda haysoo
Kursigiina midigtiyo
Mulkidaada uu galay
Waan mucaaradaynaa
Mukhlis iyo haddaad tahay
Mufti aan dadkaba dhibin
Mahlik baanu kaa dhigi
Haddii aad macsuum tahay
Ruux magan Ilaahiyo
Mawlicii wadaadana
Mujrim baanu kaa dhigi
Inta ila mabda’a iyo
Inta ila maqaamka ah
Mawqifkeenu wuxuu yahay
Maya maya yeeli mayniyo
Ma aqbalayno xaajada
Midhkaasaan ku leeyahay
Madaafiic haddaad ridi
Ama Mootarrada weyn
Amaad Miino noo xidhi
Naga dhigi maxaabiis
Ama aad ma quustiyo
Noogu yeeri mooryaan
Mabda’eenu waa kaas.
Xasan Shiikh.
Cabdiyoow Masuulnimo
Madaxnimo ninkii raba
Ha ka tuugo Mawlaha
Magac iyo wanaaggiyo
Midnimiyo iskaashiga
Ha ka dhigo majarihiis
Ha mooreeyo xaajada
Maan iyo cilmiga guud
Ha ku mooso taladiis
Horta Mayada mooyee
Yeeli mayno mooyee
Macne kale ma haysaa?
Arrin lagu maqsuudoo
Dadku kaa maqlaanoo
Waxna lagu mucaarado
Caree Miiska soo saar
Ha laguu Mashxaradee.
Faroole
Xasanoow Muraadkani
Maaha sheeko curadee
Madax kaa horreysaa
Ku muquunshay murankaas
Marti inaan noqdaayoo
Maareeynta taladiyo
Majlisyada adduunyada
Layga reebo madalaha
Maaha midaan aqbali karo.
In markaan ku soo waco
Mashquul weeye lay oran
Maqalkaaga aan gabo
Maaha midaan aqbali karo
In wixii muraadiyo
Mucaawino na soo gala
Midhba layga weydiin
Maaha midaan aqbali karo
In miskiin la ii mudo
Ama laygu maadsado
Muuqaalka wararkiyo
Maqalkiyo wargeysyada
Laga waayo magacay
Maaha midaan aqbali karo.
Manhajkeena guudiyo
Federaalka Maabka ah
Masiirkiyo ujeeddada
Yaa ku mudan Naftaydoo
Oo ku maran dareenkoo
Madaxweyne iga maqal.
Marka iyo Shabeeliyo
Maanyada Kismaayiyo
Muqdishiyo Hiiraan
Mudugiyo Bakooliyo
Magaalooyinkii idil
Haddii Maamul iyo talo
Arrinkood la maareyn
Mawduuca laga rabo
Iyo Magacyo bixintood
Marna kama maqnaan karo?
Xasan Shiikh.
Cabdaw waad mirqaantaye
Marinkiina seegtaye
Maqal oo ujeeddada
Maskaxdaada haw dhaco
Dalka madax anaa ka ah
In mareykan aan tegay
Masallaha la dhigay Yurub
Mashaariicna aan furey
Cabdiyoow ma moogide
Inaan Madasha anigiyo
Madaxdii adduunyadu
Ku mashquulsanayn talo
Mashaqada dalkeeniyo
Midnimadeena Soomaal
Cabdiyoow ma moogide.
Waataan macangageyse
Lagaa oodey marinkee
Inaad maqasho mooyee
Midh inaad tidhaahdiyo
Lagaa diiday Murankii.
Mashqriq iyo qarbiga iyo
Afrikada Madoowbiba
Marag waxay ku furayaan
Madaxweyne caanoo
Loo wada maqsuudiyo
inaan ahay ma dhaafaan.
Adna laba magaalood
Wakiil li metela iyo
Madaxoodii baad tahay.
Ha maroojin xaajada
Madaxweyne beeniyo
Magac bixinta qaladka
Mereg yeysan kugu noqon
Maqaamkaaga yey lumin
Moosku yaanu kugu jebin.
Moolku yaanu kula deign.
Maqal maanta dabadeed
Mudanaha guddoomiya
Magaalooyinkaa Bari
Magacaagu weeyaan
Marsadiyo garoomada
Malkadiyo dhaqaalaha
Maalkiyo Cashuuraha
Mashruucii yimaadaba
Anigaa Masuul ka ah
Hadalkuna mid weeyaan
Anigaa wax maanici
Anaa Maaha odhan kara.
Dalka madax anaa ka ah.
Nin kastoo Mucaaradoo
Mabda’a iyo xisbi lahayn
Mawduuc aan la soo bixin
Sharciga Maxkamadayn
Muran iyo makeekiyo
Is maqiiq la soo mood
Umadduna mid weeyaan.
La soco Qaybaha dambe.
Cabdiraxiin Hilowle Galayr
Afeef: Aragtida qoraalkan waxa ay ku gaar tahay qoraaga ku saxiixan wax xiriir ahna lama lahan tan Caasimada Online
