Muqdisho (Caasimada Online) – Guddoomiyaha maamulka gobolka Banaadir, ahna duqa magaalada Muqdisho Mudane Xasan Maxamed Xuseen (Muungaab) ayaa maanta ku baxay cabasho kasoo yeertay wadayaasha gaadiidka BL-ka oo banaanbax cabasho ah ka dhigay waddooyinka muhiimka ah, kadib markii lagu soo rogay amar lagu diinwaagelinayo gaadiidkooda.
Muungaab ayaa marka hore faray gaadiidleyda ay u hoggaamsamaan amarka, ayna raacaan hannaanka cusub oo uu tilmaamay inuu la xiriiro amniga dalka.
“Baabuurta BL-ka waxaa lagu soo rogay inay is-diiwaangeliyaan hay’adaha nabad-gelyada, gaar ahaan Nabad-sugidda inay iska diiwaan-geliyaan waxaan rabnaa baabuur walba inuu diiwaangashan yahay”. ayuu yiri duqa Muqdisho.
Waxaa kale oo uu intaas kusii daray “Waa in la ogaadaa darawalka, miikiilaha iyo odeygiisa dhaqanka, waana la diiwaangelinayaa kulligood”.
Sidoo kale wuxuu tilmaamay in tallaabadan ay qayb ka tahay dadaallada lagu sugayo amniga, laguna hubinayo bedqabka muwaadiniinta. “Gaari sumad la’aan inuu beledkan marmaro lama rabo hadhow baabuurkii dhib ka dhaco waxaa la rabaa ciddii lahayd, cidda damiin ka ahayd inay cadahay ayaa la rabaa”. ayuu mar kale yiri guddoomiye Muungaab.
Dhanka kale guddoomiye Muungaab ayaa xusay in aan wax lacag ah la qaadi doonin wadayaasha ama milkiilayaasha, taaas oo ka baxsan khidmadda rasmiga ah ee Bosteejada oo horeyba u jirtay.
“Wax lacag ah oo aan ahaynin lacagta busteejada Dowladda Hoose ee Xamar oo la’idinka qaadaayo ma jirto”. ayuu sii raaciyay.
Duqa Muqdiso ayaa sidoo kale sheegay in gaadiidka aan marin habraaca diiwaangelinta, islamarkaana aan u hoggaansamin nidaamka loo dejiyay; lala tiigsan doono tallaabo sharci ah oo waafaqsan shuruucda dalka.
Hadalkan ayuu Guddoomiyaha Maamulka Gobolka Banaadir ahna Duqa Muqdisho, Dr. Xasan Maxamed Xuseen (Muungaab) sheegay isagoo ay barbar taagnaayeen masuuliyiin ay ka mid yihiin Taliyaha Hay’adda Nabad-Sugidda iyo Sirdoonka Qaranka (NISA) ee Gobolka Banaadir, oo muujiyay muhiimadda hirgelinta nidaamkan cusub ee amniga lagu xaqiijinayo.