Washington (Caasimada Online) – Hay’adda Dambi-baarista Federaalka Mareykanka (FBI) ayaa ku dhawaaqday abaalmarin lacageed oo gaareysa illaa $150,000, taas oo la siin doono cid kasta oo bixisa xog horseedi karta in la soo qabto lana horkeeno cadaaladda eedeysane lagu magacaabo Fahad Maxamed Nuur.
Fahad Maxamed Nuur oo ah muwaadin Mareykan ah kana soo jeeda Soomaaliya ayaa lagu eedeeyay inuu ku lug lahaa musuq-maasuq lagu lunsaday malaayiin doolar oo loogu talagalay Barnaamijka Federaalka ee Nafaqeynta Carruurta xilligii uu dunida ka jiray cudurka COVID-19.
Bayaan ay soo saartay FBI-da ayaa lagu sheegay in Fahad la rumeysan yahay inuu u baxsaday Soomaaliya, iyadoo hay’addu shacabka ka codsatay inay la wadaagaan xog kasta oo gacan ka geysan karta soo qabashadiisa.
“Nuur waa muwaadin Mareykan ah oo asal ahaan ka soo jeeda Soomaaliya, waxaana hadda la rumeysan yahay inuu u baxsaday dalkaas,” ayaa lagu yiri bayaanka FBI-da.
Sida ku cad dukumiintiyada maxkamadda, Maxkamadda Federaalka ee Degmada Minnesota, oo ku taalla magaalada Minneapolis, ayaa 13-kii Sebtembar 2022 u jartay Fahad Maxamed Nuur waaran qabasho, kaddib markii lagu soo oogay dacwado la xiriira falal musuq-maasuq.
FBI-da ayaa sheegtay in eedeymaha loo haysto Fahad ay isugu jiraan lacag dhaqid, lunsasho hanti dadweyne iyo dambiyo kale oo la xiriira khiyaano maaliyadeed, kuwaas oo ka dhashay baaritaanno lagu sameeyay barnaamijkii quudinta carruurta xilligii safmarkii COVID-19.
Ku dhawaaqista abaalmarintan ayaa muujineysa dadaalka ay dowladda Mareykanka ugu jirto sidii loo soo qaban lahaa eedeysaneyaasha la xiriira kiiskan, iyadoo FBI-du caddeysay inay sii wadeyso la shaqeynta hay’adaha kale ee fulinta sharciga si cadaaladda loo horkeeno dadka lagu tuhunsan yahay dambiyadan.