Jigjiga (Caasimada Online) – Ururka ONLF oo dhowaan dalka Itoobiya ku laabtay kadib heshiis ay la gaareen dowladda dalkaas, ayaa maanta shaaca ka qaaday inay samaysteen xisbi siyaasadeed.
ONLF ayaa xisbigan siyaasadeed uga qeyb geli doono doorashada dowlad Deegaanka Soomaalida iyo tan federaalka, ayaga oo sida qorshahooda yahay ka dhex muuqanayaa siyaasadda dalka Itoobiya.
Sheekh Cabdiraxmaan Maxamed Sheekh Mahdi (Maadeey) oo ah xoghayaha arrimaha dibadda ONLF ayaa BBC u sheegay in si buuxda doorashooyinka soo socda ee Dowlad Deegaanka Soomaalida ay uga qeyb geli doonaan.
Waxa uu sheegay inay isbahaysi la samaysanayaan oo ay iskaashanayaan xisbiyo ay bahwadaag yihiin oo ka dhisan gobolka soomaalida.
“Jabhadda xoreynta Ogaadenia 1991-kii ayay xisbi ka noqotay dalkan oo ay doorashada ka qeyb gashay oo maamulkii ugu horreeyay deegaanka soomaalida ka dhistay, hadda soo noqoshadeeda waxaan maanta shaaca ka qaadeynaa in si buuxda siyaasaddeedii dib ugu noqon doonto oo si nabadgelyo ah doorashooyinka soo socda uga qeyb geli doonto” ayuu yiri Maadeey.
Wuxuu sheegay in hadda ay si nabadgelyo ah ay ku raadinayaan xuquuqda iyo danaha shacabka.
Caasimada Online
Xafiiska Muqdisho
[email protected]