Garoowe (Caasimada Online) – Wasiirka Warfaafinta Puntland, Maxamuud Caydiid Dirir oo maanta si weyn ugu gefay Ra’iisul Wasaaraha Soomaaliya ayaa waxaa ka dhalatay hadalkiisa caro xooggan oo bulshada Soomaaliyeed ka muujiyeen.
Maxamuud Caydiid ayaa ku tilmaamay Ra’iisul Wasaare Xamza qof marxuum ah, sidoo kalena uu ku jiray dadkii Xamar lagaga qaxay 1991-kii, taasi oo uu shaki ku galiyay nasabadiisa. Tan ayaa ka baxsan anshaxa iyo weerarada siyaasiga ah, taas oo shacabka ka careysiisay, ceeb weyna dhex istaajisay maamulka Puntland ee uu hoggaamiyo Saciid Deni.
“Xamza waa marxuum ciqaab ku jira, shaki ayaana igaaga jira inuu u dhashay reerka uu sheeganaayo, dadkii Xamar lagaga qaxay 1991-kii ayuu jiray” ayuu Wasiir Caydiid.
Hadalkan ayaa dhaliyay fal-celin xooggan, waxaana ka carooday dad badan oo Soomaaliyeed oo ay ku jiraan kuwa kasoo jeedo Puntland oo sheegay in wasiirku aanu ku metalin hadalkaasi, ayna u arkaan gef cad oo uu u gaystay Ra’iisul Wasaaraha Qaranka.
Marka laga soo tego khilaafka guud e u dhexeeya dowladda federaalka iyo Puntand, ayaa waxaa haddana si gaar ah isku hayo Xamza iyo Deni oo siyaasad ahaan kala fog, wuxuuna dagaalkooda soo bilowday markii loo magacaabay Ra’iisul Wasaaraha Soomaaliya.
Haddaba, Sidee looga fal-celiyay arrintaan?
Cumar Aadan: “Nin baa qofka sida uga aradan akhlaaqda iyo anshaxa umad dhan matalaad uga dhigay. Ayaan daro waynaa.”
“Naxdin waynaa tii Puntland ahayd cuquba ku dhacday,” ayuu yiri Cabdirisaaq Cabdi.
Cabdicasiis Maxamed ayaa isna waxa uu yiri “Aflagaado iyo dhaqan xumo cad weye waxaan. Xayndaabkii dhaliisha waa ka gudbay qofkani.”
Cabdifataax Dhaqaaje: “Ninkaani afxumo waxaan ahayn Puntland kuma soo kordhiyo.”
“Wataa Puntland hooyada Federaalka ahayd cay waxaan ahayn kama imaanayaan, inta hartay hala daba qabto. Xukuumad dhan oo shirtay oo in la caytamo go’aamisay waa aakhiro samaan,” ayuu yiri Axmed Gaas oo kamid ah dadka ka fal-celiyay arrintaan.
Jamaac Faarax: “Dhaqan iyo anshax midna maaha sida uu wasiirku u hadlay mana habboona hadallada caynkaas oo kale ah oo nasabadda qofka gaadheya in la baahiyo.
Doodaha siyaasadda iyo kala aragti duwanaanta iyo kala cad-goosigu waa xaajo rag lkn arrinta nasabaddu uma fudada sidaan in looga hadlo.”
Maxamed Cabdiqaadir Jacfaan ayaa sidoo kale waxa uu yiri: “Puntland qofka sidaa u caytamaya haduu kasii mid ahaado haykalkeedii dowladnimo iyo sumcad badan bay luminaysaa.”
Liibaan Xirsi Aw Faarax: “Ninkaasi waaa ina ceebeeyey wasiirka ah hadalkaasi hdl masuuleed maaha waana u garaabaynaa sidaasi haduusan u hdlin Dani lacag kama helaayo waana la soo cayrin nin tolkiis maagaayey ma cidkale u daahayaaana.”