Muqdisho (Caasimada Online) – Ra’iisul Wasaaraha Soomaaliya Xamza Cabdi Barre ayaa maalin kahor socdaal ku tegay degmada Aadan Yabaal ee gobolka Shabeellaha Dhexe, halkaasi oo uu kula kulmay inta badan saraakiisha hoggaamineysa dagaalka lagula jiro argagixisada.
Safarka ra’iisul wasaaraha ayaa kusoo aaday xilli dowladda ay aaminsan tahay in ciidanka kala fur-fur ka dhex bilaabeen saraakiil ku xiran siyaasiyiin dibad joog ah, oo dalka xilal kasoo qabtay, kuwaasi oo la sheegay inay diidan yihiin inuu Xasan Sheekh qaato libinta dagaalka argagixisada.
Ra’iisul wasaare Xamza ayaa shalay ka sheegay Aadan Yabaal in la xisaabinayo oo aan laga hareyn kuwa dibin-daabeynaya halganka dagaalka iyo isku duubnida ciidanka.
Saddex natiijo ayaa la sheegay inuu dhalay socdaalka Xamza ee degmada Aadan Yabaal, kuwaasi oo kala ah;
1. Qanaacada ciidanka
Ra’iisul wasaaraha ayaa la sheegay inuu kusoo guuleystay inuu qanciyo askarta furinta joogta iyo saraakiisha hoggaamineysa dagaalka, isaga oo kusoo qanciyay in la saxaayo dhamaan waxyaabaha sida saxda ah u muuqda ee qaldamay iyo sidoo kale in laga qabanaayo kuwa danaha guracan ku dhex wada ciidanka, iyada oo aan loo eegayn heerka masuuliyadooda.
Ciidanka ayaa la sheegay inay ku qanceen ballan-qaadyada ra’iisul wasaaraha iyo heegan ahaanshaha ka muuqda waxayna go’aansadeen inay markale u dhaqaaqan furimaha dagaalka.
Natiijo weyn ayaa loo arka oo saamaxeysa inuu dagaalka u dhaqaaqo sida intii hore ka xoog badan.
2. Go’aan qaadasho
Ra’iisul wasaaraha Soomaaliya ayaa lasoo warinayaa inuu safarkaasi kasoo helay xogo uu ku go’aan qaadan karo. Marwalba oo ciidanka dhex gasho waxaad ogaaneysa waxyaabo aadan ogeyn markii aad jiifto Villa Somalia.
Illo xogagaal u ah xafiiska ra’iisul wasaaraha ayaa laga soo xiganayaa in ra’iisul wasaaraha ka fikirayo inuu go’aan ka qaato shaqsiyaadka qaar, kadib markii uu soo dhageystay ciidanka iyo saraakiisha. Waxaana go’aanadaas sida weyn loo sugayo ay cadeyn doonaan masuuliyada qaladaadka waxayna tamar cusub gelin karaan dagaalka.
3. Adkeynta hadafka dagaalka
Xamza iyo ciidanku waxay isla qaateen ballan ah in aan dagaalka laga soo noqon oo meel cidlo ah la dhigin dhiigga raggii u dhintay inay argagixisada ka sifeeyaan inta u dhaxeysa Muqdisho illaa Ceelbuur.
Ciidanka xoogga dalka iyo madaxdooda ayaa ra’iisul wasaaraha ka ballan-qaaday inuu hadafka dagaalka sidiisa yahay, ayna u dhaqaaqayaan dhameystirka argagixisada, halka uu ra’iisul wasaaraha ballan-qaaday dalacsiin iyo dhameystirka xuquuqda ay u qalmaan ciidanka xoogga dalka.
Safarkaan ayaa u muuqday inuu ciideeyay qorshaha ay sheegtay dowladda inay siyaasiyiinta qaar ku mashquulsanayeen maalmahan ee kala fur-furida ciidanka qaranka iyo fashilinta dagaalka argagixisada.
