Muqdisho (Caasimada Online)-Guddoomiyaha Golaha shacabka ee baarlamaanka Somalia Maxamed Mursal Sheekh C/raxmaan ayaa maanta irdaha u furay Xafiisyo dhowr ah oo lagu kordhiyay dhismaha baarlamaanka Somalia.
Mursal oo maanta gaaray Xarunta ayaa Xafiisyada ku wareejiyay qaar kamid ah guddiyada Golaha shacabka baarlamaanka si ay ugu shaqeeyan xafiisyada cusub.
Guddoomiye Mursal ayaa furayaasha xafiisyada ku wareejiyay gudiyo ay kamid yihiin:-
Guddiga arrimaha bulshada ee golaha shacabka, Guddiga ganacsiga iyo dhaqaalaha ee golaha shacabka, Guddiga difaaca ee golaha shacabka, Guddiga beeraha ee golaha shacabka, Guddiga xeer hoosaadka ee golaha shacabka.
Mursal ayaa sheegay in guddi waliba uu kula xisaabtami doono waxqabadkooda maadaama aysan ku andacoon Karin xafiis la’aan.
Sidoo kale, Mursal waxa uu cadeeyay inay adkaan doonto inay dhacdo guddi Xafiis la’aan ah waxa uuna ballanqaaday in gudiyada harsan ay heli doonaan Xafiisyo.
Guddoomiyaha Golaha shacabka ee BJFS Mudane Maxamed Mursal Sheekh C/raxmaan ayaa guddiyada golaha kula dardaarmay iney shaqooyinkooda sii laba jibaaraan, maadaama loo dhisay xafiisyadii ay u baahnaayeen.
Guddoomiyaha ayaa xusay inuu ku faraxsan yahay inuu ka dhabbeeyo balan qaadkii ahaa in guddi walbo uu helo xafiis u gaar ah.
