Havana (Caasimada Online) – Wasiirka Arrimaha Dibadda Soomaaliya Abshir Huruuse ayaa khudbad ka jeediyay shirka caalamiga ah ee ururka G77+China oo Laba maalin ka socday magaalada Havana ee dalka Cuba.
Ururka G77 ayaa markii hore lagu aas-aasay 77 dal oo Soomaaliya ku jirto tan iyo 15 Juun 1964, oo hadda 60 sano jirsadey waxaana xubno ka ah 134 dal oo ay ku nool yihiin 80% dadka adduunku.
Shirkan ayaa ku saabsanaa kaalinta sayniska, hal-abuurka iyo tiknoolajiyaddu ku leeyihiin horumarka iyo kobaca dhaqaalaha adduunka.
Wasiirka ayaa khudbadiisa shirka kaga hadlay horumarka baaxadda leh ee Soomaaliya ka gaartay xagga isgaarsiinta, lacagaha danabaysan iyo adeegyada bangiyada ee telefoonka laga isticmaalo oo dalkeennu ka mid yahay kuwa ugu hormarsan dunida.
“Ujeeddada shirarkan ayaa ahaa adkaynta iskaashiga iyo xiriirka waddamada aan saaxiibada dhow nahay iyo kuwa aynu xubnaha ka wada nahay ururrada caalamiga ah ee aynu had iyo goor iska kaashanno qaddiyadaha caalamiga ah,” ayuu yiri Wasiir Abshir Huruuse oo shirkan Soomaaliya ku matalayay.
Wasiirka ayaa intaas kusii daray “Dowladdeennu waxay marwalba mudnaanta kowaad siisaa in ay bulshada caalamka kula dhaqanto siyaasad xasiloon oo ku dhisan saaxiibtinimo, iskaashi iyo is qaddarin.”
Wasiirka ayaa sidoo kale waxa uu kulamo gaar-gaar ah la qaatay qaar kamid ah madaxda wafuudda shirka kasoo qayb-gashay iyo kuwa dowladda martida loo yahay ee Cuba.
