Sawirro: Waa kuwee shanta wasiir ee maanta la wareegay xilalka wasaaradahooda?

By Guuleed Muuse

Muqdisho (Caasimada Online) – Qaar kamid ah Golaha Wasiirada cusub ee xukuumadda federaalka Soomaaliya ayaa maanta xilka la wareegay Wasaaradaha loo magacaabay, kadib kalsooni siinta Golaha Shacabka ee 7-dii bishaan.

Xil-wareejinta ugu horreysa ayaa maanta ka dhacday Xafiiska Ra’iisul Wasaare ku-xigeenka dalka, munaasabadda ayaa waxaa xilka kula wareegay ku-xigeenka cusub ee Ra’iisul Wasaare Xamza ee Saalax Jaamac, oo uu ku wareejiyay Mahdi Guuleed oo ahaa Ra’iisul Wasaare ku-xigeenkii xukuumaddii hore.

Sidoo kale waxaa xilka la wareegtay Wasiirka cusub ee Wasaaradda Bii’ada iyo Isbeddelka Cimillada Marwo Khadija Mohamed Al-makhzoumi oo maanta si rasmi ah xilka ugala wareegtay Ra’iisul Wasaare ku-xigeenkii hore Mudane Mahdi Maxamed Guuleed, oo Waaxda Bii’adu ay hoos tagi jirtay xafiiskiisa.

Wasaaradda Labaad ayaa ah Wasaaradda Gaadiidka iyo Duulista Hawada oo uu wasiir ka ahaa Duraan Cali Faarax, isaga oo xilka ku wareejiyay Wasiirka cusub ee wasaaradda, Marwo Fardowsa Cismaan Cigaal.

Wasaaradda Saddexaad ee maanta xil-wareejinteedu dhacday ayaa aheyd Wasaarada Dekadaha iyo Gaadiidka Badda oo Wasiirkii hore ee wasaaradaas Marwo Maryan Aweys Jaamac ay xilka ku wareejisay Wasiirka cusub Mudane Cabdullaahi Axmed Jaamac (Ilka-jiir).

Ra’iisul Wasaare ku-xigeenka Saalax Jaamac ayaa sidoo kale xilkii u kala wareejiyay wasaarada Afaraad oo aheyd Wasaaradda Maaliyadda oo Wasiirkii hore ee Dr Cabdiraxmaan Bayle uu xilka ku wareejiyay Wasiirka cusub ee wasaarada Dr Cilmi Maxamed Nuur.

Xil-wareejintii ugu dambeysa ee maanta dhacday ayaa waxa xilka kula wareegay Wasiiru-dowlaha Xafiiska Ra’iisul Wasaaraha, kaasi oo si rasmi ula wareegay Xirsi Jaamac Cumar, oo xilkii uu kala wareegay Cabdixakiin Xasan Ashkir oo ahaa Wasiiru-dowlihii Xafiiska Wasiirka koowaad ee xukuumadda.

Sida uu qorshuhu yahay xil-wareejinta Wasiirradaha cusub ayaa sii socon doonta illaa maalinta Sabtida oo ay taariikhu ku beegan tahay 13-ka bishaan.