Muqdisho (Caasimada Online) –Madaxweynaha Soomaaliya Xasan Sheekh Maxamuud ayaa magaalada Muqdisho kula kulmay Taliyaha Ciidanka Mareykanka ee Afrika (AFRICOM) General Michael E. Langley, isagoo kala hadlay iskaashiga la dagaalanka argagixisada ee Soomaaliya iyo Mareykanka.
Madaxweynaha iyo Taliyaha waxaa kulankaan ku wehliyey Taliyaha Ciidanka Xoogga Dalka Soomaaliyeed Jeneraal Odawaa Yuusuf Raage iyo Safiirka Mareykanka ee Muqdisho, waxaana wadahadkaan diiradda lagu saaray dardargelinta dadaallada wadajirka ah ee dagaalka argagixisada.
Masuuliyiinta ayaa isla gartay in la xoojiyo isku-duwidda qaab-dhismeedka ballaaran ee iskaashiga amniga, oo ay ku jirto AUSSOM, howlgalka cusub ee Midowga Afrika.
Madaxweynaha ayaa muujiyay sida weyn ee ay Soomaaliya ugu mahadcelineyso taageerada joogtada ah ee Mareykanka uu ka geysto dagaalka ka dhanka ah argagixisada caalamiga ah.
Taageerada duqeymaha ayey Madaxweynaha iyo Taliyaha Xoogga aad uga dalbadeen sarkaalkaan Mareykanka u qaabilsan hoggaaminta howlgalkooda Afrika.
Dowladda Soomaaliya oo soo iibsatay diyaaradaha dagaalka ayaa weli Mareykanka weydiisata in duqeymo looga fuliyo goobaha lagu bartilmaameedsado Khawaarijta Al-Shabaab iyo Daacish.
Diyaaradaha dagaalka ee dowladda ayaan weli la howlgelin, waxaana jira farsamooyin qaldan oo aan la sixin lana shaacin, balse Caasimada Online ayaa ogaatay in Talisyada Xoogga Dalka iyo NISA ay isku qabsadeen maamulka diyaaradahaas.
