Muqdisho (Caasimada Online) – Ciidamada kala duwan ee qalabka sida ee dowladda Soomaaliya ayaa waxaa ka maqan xuquuqdooda aasaasiga ah oo ay lahaayeen, waxaana qaarkood bilooyin aysan arag mushaaraadkooda.
Saraakiisha ciidamada oo qaarkood aan la sheekeysanay ayaa sheegay in ciidamada meletariga ay ka gadoodeen seddex arin oo kala ah in mushaarkooda uu ka maqan yahay muddo ka badan hal sano.
Arinta labaad ee ay ka gadoodeen ayay ku sheegeen inay tahay amar kasoo baxay madaxweynaha Soomaaliya Maxamed Cabdulaahi Maxamed, kaasi oo ahaa in gabi ahaanba laga saaro magaalada Muqdisho oo dibada loo diro.
Waxay saraakiisha sheegeen inay qaadanayaan amarkaasi, balse ciidamada loo baahan yahay iney helaan dhamaan xuquuqda ka maqan kadibna ay ku qanci doonaan amarka madaxweynaha.
Arinta seddexaad ee ay ka banaan baxeen ayay ku sheegeen qaar kamid ah saraakiisha inay tahay inay doonayaan helitaanka gunnooyin iyo raashinkii ay lahaayeen ciidamada xooga dalka, kuwaasi oo laga jaray sanado ka hor.
Sidoo kale waxay saraakiisha inoo sheegeen inay heystaan kalsooni ay ku banaanbixi karaan, ku gadoon karaan maadaama ay heystaan madaxweyne ka damqanaya, sida saraakiisha qaar ay inoo sheegeen.
Afartii sano ee madaxweynaha dalka uu ahaa Xasan Sheikh Maxamuud ma jirin gadood ciidamada ay sameynayeen, waxaana qaarkood aysan helin bilooyin mushaarka ay lahaayeen.
Caasimada Online
Xafiiska Muqdisho
[email protected]