Muqdisho (Caasimada Online) – Hogaamiyaha maamul Goboleedka Koonfur Galbeed, Shariif Xasan Sheekh Aadan ayaa ku dhawaaqay in mar kale uu u tartami doono jagada madaxtinimada Koonfur Galbeed.
Shariif Xasan ayaa musharaxnimadiisa ka iclaamiyay kulan uu Magaalada Muqdisho kula qaatay Xildhibaanada labada Aqal ee laga soo doortay Koonfur Galbeed waxa uuna shaaciyay in mar kale uu u tartami doono jegada madaxtinimada Koonfur Galbeed.
Shariif Xasan waxa uu Xildhibaanada weydiistay in lagala shaqeeyo sidii uu markale ku soo laaban lahaa isagoo ballanqaaday inuu la imaan doono isbedel.
Shariif Xasan waxa uu iftiimiyay in doorashada ay qabsoomi doonto waqtigii loogu talagalay, isla-markaana aanay dib uga dhici doonin 17-ka bisha November ee sanadkan.
Shariif Xasan Sheekh Aadan, Hogaamiyaha Dowlad Goboleedka Koonfur Galbeed ayaa waxaa la doortay 17-kii November ee sanadkii 2014.
Sidoo kale, wuxuu sheegay in shaqada maamulka uu ka soo bilaabay meel hoose, maantana uu soo gaarsiiyay meel sare, isla-markaana uu diyaar u yahay in horey uu maamulka u sii dhaqaajiyo.
Dhinaca kale, Hogaamiyaha Koonfur Galbeed ayaa ugu dambeen dadka reer Koonfur Galbeed ugu baaqay inay taageeradooda siiyaan, si maamulkiisu uu markale xafiiska ugu soo laabto.
Caasimada Online
Xafiiska Muqdisho