Muqdisho (Caasimada Online) – Fal-celin xooggan ayaa ka dhalatay heshiiska afarta qodob ah ee ay Arbacadii ku gaareen Villa Soomaaliya Madaxweyne Xasan Sheekh Maxamuud iyo siyaasiyiinta mucaaradka ee ku midoobay Madasha Samatabixinta Soomaaliyeed.
Labada dhinac oo yeeshay kulan xasaasi ah ayaa ugu dambeyn isku raacay in laga wada-hadlo illaa afar ajande oo muhiim ah, kuwaasi oo kala ah;-
1- Adkeynta midnimada dalka
2- Hannaanka dib-u-eegista dastuurka
3- Amniga iyo ciribtirka argagixisada
4- Hannaanka doorashooyin toos ah oo heshiis lagu yahay
“Shirka oo ku furmay jawi wanaagsan iyo isxog-wareysi ayaa dood dheer iyo falanqeyn kadib, waxaa la isku raacay in laga wada-hadlo afar ajande oo muhiim u ah dowlad-dhiska Soomaaliya,” ayaa lagu yiri bayaan kasoo baxay Madaxtooyadda Soomaaliya.
Sidoo kale waxay dhinacyadu isla qaateen in mas’uuliyiinta wali ka maqan gogosha la baadi goobo, isla markaana ay soo xaadiraan wada-hadallada furmaya horraanta bisha July.
Haddaba, Sidee looga fal-celiyay hehiiska Madaxweyne Xasan Sheekh iyo mucaaradka?
Mahad Maxamed: “Mudane Madaxweyne wada-hadal wax dhaamo waa lawaay runtii shaqo boggaadin mudan ayaa dalka u jiheysay guuleyso Madaxweyne”.
Cabdicasiis Nuur Garabey: “Qodobka labaad iyo afaraad ayaa ugu muhiimsan, haddii la isku fahmo”.
Suudi Nageeye: “Wada-hadalladu waa xalka doodaha iyo kala aragti duwanaashaha dowladnimadu u baahan tahay.”
Cabdiraxmaan Xaaji Ismaan: “Madaxweyne Xasan ilaali nidaamka heshiiska lagu yahay, hana ka bixin balanta aad la gaartay madaxdeenna beri”.
“Mar haddii la ogolaaday in dastuurka la’isla eego xalku waa dhowyahay,” ayuu yiri Shamsudiin Aadan Xasan.
Suldaan Xiris Cali Maxamed: “Waxaan rejeynayaa inaa is fahmi doontaan, una turi doontaan dalka iyo dadka Soomaaliyeed”.