Hargeysa (Caasimadda Online)- Dowladda Imaaraadka Carabta ayaa la rajeenayaa in diyaaradaheeda dagaalka ay sida ugu dhaqsiyaha uga howlgalaan saldhigga cusub oo ay ka sameysatay Berbera, waxaana amar kasoo baxay sarkaal sare oo Somaliland ka tirsan lagu sheegay inay Imaaraadka fasax u yihiin inay howgalkooda sida ugu dhaqsiyaha badan u bilaabaan.
Sacad Cali Shire oo ah wasiirka Arrimah Dibadda Somaliland ayaa ka hadlay arrinta ku aadan saldhigga Berbera iyo waqtiga ay tahay inay howgalkooda weerarada ah ka qaadaan.
Wuxuu tilmaamay Wasiirka in Imaaraadka Carabta ay saldhigga Berbera u isticmaali karaan qaab kasta oo ay doonayaan haddii ay ahaan laheyd howgalo Militari, Tababaro iyo ilaalinta Badda iyadoo ay xusid mudan tahay in Berbera ay 250 KM u jirta koofurta Yemen, halkaasoo isbaheysiga uu hoggaaminayo Sacuudiga oo ay ku jirto Imaaraadka Carabta dagaalo kula jiraan Jabhadda Xuutiyiinta.
Maraakiibta Dagaalka Imaaraadka Carabta ayaa aad igu soo dhawaaday biyaha Dakadda Berbera inkastoo saldhigga uu weli ku socdo dhismo, waxaana lagu wareejiyey shirkadda DP World oo laga leeyahay dalka isu tagga imaaraadka Carabta.
Wasiirka oo wareysi Xasaasi ah siiyey Laanta Afka Soomaaliga ee VOA, ayaa si weyn u difaacay go’aanka Imaaraadka lagu siiyey Saldhigga Berbera, waxaana arrintaas kulan gacmaha la isugu tagay ku ansixiyey golaha Baarlamaanka Somaliland.
Mr Sacad Cali Shire ayaa sheegay in uusan aaminsaneyn in saldhiga milateri ee Imaaraadka ka isticmaalayo Berbera uu khilaaf ka abuuri karo gobolka, waxaa uu tilmaamay in horay Imaaraadku saldhig milateri ugu lahaayeen Dekeda Casab ee dalka Eritrea, taasna aanay wax khilaaf ah ku keenin Gobolka.
Dadka Falanqeeyo Siyaasadda Soomaaliya ayaa aaminsan in go’aanka Saldhigga Berbera ee Imaaraadka uu keeni doono isku dhac iyo khilaaf ka bilowdo Soomaaliya, Xilli Xuutiyiinta Yeman ay ku hanjabeen inay weeraro ka geysan doonaan Soomaaliya haddii ay duqeyn kala kulmaan Saldhigga Berbera.