Muqdisho (Caasimada Online) – Ra’iisal Wasaaraha Itoobiya Abiy Ahmed iyo Madaxweynaha Somaliland Muuse Biixi Cabdi ayaa kala saxiixday heshiis is-afgarad oo dhigaya in Itoobiya ay Somaliland ka hesho dekad iyo BAD ay saldhig ka dhigtaan ciidamadeeda badda ee dhowaan dib loo aas-aasay.
Madaxweynaha Somaliland, oo ka hadlay shir jaraa’iid oo ay wada-qabteen Abiy Ahmed ayaa sheegay in Somaliland ay is-afgaradkan ku beddelatay in Itoobiya ay u aqoonsanto Somaliland dal madax-banaan marka heshiiska la saxiixo.
Muuse Biixi ayaa sheegay in Somaliland ay siineyso Itoobiya dhul-badeed dhan 20 km oo ay degaan ciidankooda badda, kaasi oo uu sheegay inuu yahay kiro.
Madaxweynaha Soomaaliya Xasan Sheekh Maxamuud oo shalay la hadlay labada Aqal ee Baarlamaanka ayaa sheegay in tallaabada Itoobiya ay qaaday ay tahay “nasiibdarro.”
“Cid awood u leh dhulka Soomaaliya cad ka mid ah inay bixiso ma jirto,” ayuu yiri Madaxweynaha Soomaaliya oo sheegay in dhulka ay iska leeyihiin jiilka soo socda.
Madaxweynaha Soomaaliya ayaa sheegay in is-afgaradka looga dhowaaqay Addis Ababa uusan “sina dhaqangal u noqon doonin.”
Haddaba maxay yihiin tallaabooyinka sharci ee hadda dawladda Soomaaliya u furan?
Sharci yaqanada ka faallooda sharciga caalamiga ah ayaa qaba in Dowladda Soomaaliya ay u furan tahay inay sameeyso saddex arrin.
Dowladda Soomaaliya waxaa ay sheegatay in ay qaadi doonto tallaabooyin dheerad ah oo la xiriira heshiiska Itoobiya iyo Somaliland.
“Tallaabooyinka ay qaadi karto Soomaaliya ee u furan ayaa waxa ka mid ah in ay ka codsato golaha amamanka, golaha Midowga Afrika, IGAD iyo jaamacadda Carabta, inay Itoobiya ku cadaadinayaan inay kusoo laabato xayndaabka sharuucda caalamiga ah oo la arko in ay halis ku tahay nabad gobolka iyo xeerarka caalamiga ah,” ayuu yiri Axmed Cali Kheyre .
“Dawladda Soomaaliya waxa kale oo u furan in kiiska ay gayso maxkamada caalamiga ah ee Cadaalada si la mid ah heshiiskii isfahamka ahaa ee dhax maray kenya Soomaaliya balse markii dambe ay Soomaaliya gaysay maxkamada caalamiga ah ee Cadaalada Adduunka,” ayuu hadalkiisa sii raaciyay.
Axmed Cali Khayre waxaa uu sheegay in dowladda Soomaaliya ay sidoo kale qaadi karto taallabooyin kale oo ay ka mid yihiin “in dalka ay ka saarto ciidanka Itoobiya ee qeybta ka ah howlgalka nabad ilaalinta ku meel gaarka ah ee ATMIS”.
“Sharciga caalamiga ah waxa uu qaba in hadii dal lagu soo xadgubo uu isdifaaco marka waa qodob kale oo u furan dowladda Soomaaliya,” ayuu yir Axmed Cali khayre.
Dowladda Itoobiya ayaa horey heshiis ula gashay Soomaaliya sanadkii 2018-kii waxan heshiiskaas oo ka kooban ilaa 7 Qodob oo ka mid ahaa in Itoobiya ay maalgashato illaa 4 dekedood oo ka mid ah kuwa Soomaaliya .
