Toogasho iyo dil ka dhashay sheeko yaab leh oo maanta ka dhacay Muqdisho

Muqdisho (Caasimada Online) – Askari ka tirsanaa ciidamada dowladda ayaa goor-dhow lagu dilay agagaarka isgoyska Cali Kamiin ee magaalada Muqdisho, halka qof kalena uu ku dhaawacmay.

Dilka askarigaan ayaa waxaa uu ka dhacay bar-koontorool oo ciidamada dowladda Soomaaliya ay ku leeyihiin agagaarka isgoyska Cali Kamiin, waxana ka dambeeyay askari kale oo ka tirsan askarta dowladda.

Qof goobjooge ahaa xilliga dilka uu dhacayay ayaa Caasimada Online u sheegay in dilka uu yimid kadib markii askariga la dilay uu isku dayay in bajaaj uu marsiiyo waddada oo ciidamada u xirneyd, hase yeeshee taasi ay muran ka dhalatay.

“Waxaa xirneed waddada, wiilka bajaajta watay ayaa arkay askari uu yaqaan kadibna waxaa uu ka codsaday in uu ka gudbiyo askarta, waxayna isku raaceen oo ay isku afgarteen in askariga bajaajta uu wado, wiilka bajaajta lahaana gadaal ayuu raacay, waxaa uuna iska dhigay qof bajaajta saaran, kadibna waxaa ay gaareen askartii, kuwaasi oo diiday in ay bajaajtu gudubto, muran dheer kadib askartii bajaajta ayay rasaas u fureen.” Ayuu yiri goobjoogaha.

Goobjoogaha waxaa uu sheegay in rasaastii bajaajta lagu furay uu ku dhintay askarigii mootada waday ee doonayay in uu gudbiyo, iyada oo sidoo kale-na ninkii mootada horay u watay uu soo gaaray dhaawac culus, isla markaana loo qaaday mid ka mid ah isbitaallada magaalada Muqdisho.

Askarta joogta agagaarka isgoyska Cali Kamiin ayaa inta badan waddada iska xirta, ayaga oo bajaale-yaasha ku qasba inay bixiyaan lacag baad ah, ama dib u noqdaan.

Caasimada Online
Xafiiska Muqdisho
caasimada@live.com