Addis Ababa (Caasimada Online) Magaalada Addis Ababa waxaa maalintii seddaxaad ka socda shir ay lee yihiin wafdi ka socda dowladda Soomaaliya iyo maamulka Axmed Madoobe.
Wariyaha Shabakadda Caasimada Online ayaa soo sheegaya in shirka uu sii adkaaday, waxaana laga yaabaa in ay lagu kala boodo sida marka ay wax u socdaan iyo qoddobada meesha yaalla la eego.
Tan iyo xaley waxaa yaabaha la isku mari la’aa waxaa ka mid ahaa in la badelo magaca maamulka Jubbland, waxaana Axmed Madoobe loo soo jeediyay in maamulkaas loo bixiyo maamulka Seddax gobal ee Jubbada Hoose, Jubbada Dhexe iyo Gedo.
Sidoo kale, wax yaabaha la isku mari la’yahay waxaa kaloo ka mid ah in dowladda Soomaaliya lagu wareejiyo maamulka Axmed Madoobe inta ka dhimman iyo sida loo soo xulaayo.
Wafdiga DF Somalia waxaa ay soo jeediyeen in Axmed Madoobe uu madaxweyne guud u noqdo seddaxda gobal balse labada gobal ee Jubbada Dhexe iyo Gedo loo sameeyo guddoomiye u gaar ah, arrintaas Axmed Madoobe iyo wafdigiisa waa ay u cuntami weysay.
Sidoo kale, waxaa la lee yahay waxaa jirra in Axmed Madoobe loo sheegay in madaxweyne aan la dhihi doonin oo loogu yeeri doono Barasaaf ama guddoomiye maamul.
Dowladda Soomaaliya waxaa kaloo la sheegay in ay aqoonsatay maamulka Axmed Madoobe balse waxaa muranka uu ka taagan yahay in dowladda ay soo dhisi dooni doonto guddiga fulinta iyo kan sharciga.
Labada qodob midka dambe waa sahlanyahay oo magacu macna badan ma sameeynayo, madaxweyne iyo governor kii loogu yeedho mar hadii awoodiisa sharciyadeed ee maamul ay qeexantahay,balse arinta dhibka leh waxaa weeye maamul goboleed baan idiin aqoonsanay golihiina fulinta iyo kan baarlamaanka anagaa idinla magacaabeena,arintaas waa meel ka dhac iyo waxba matihiin.
Arinta la sugayo in bari dhinac u dhacdo waa dowrka dowladu ay ku yeelanayso dhameystirka qeybaha ka dhiman maamul goboleedka.
Si kastaba, Axmed Madoobe wuxuu ku adkeestay in aan la badelin Gen: Cabdilaahi Ismaacil Fartaag oo ah madaxweyne ku-xigeenka maamulka Jubbaland.
Haddii qoddobadan la isku afgarto waxaa hubanti ah in labada dhinac ay ku dhawaaqi doonaan heshiis buuxa taasoo si rasmi ah loogu dhawaaqi doono halka uu shirka ka socda.
Dhinaca kale, waxaa warar ku dhowdhow oo aan ka helay halka shirka uu ka socdo, waxaa laga yabaa caawa ama berri in uu shirka ku biiro wasiirka arrimaha gudaha iyo amniga qaranka Cabdikariin Xuseen Guuleed.
Ma cadda wax yaabaha keenay in wasiirka arrimaha gudaha loogu baahdo in uu ku biiro shirka ka socda magaalada Addis Ababa.
Caasimada Online
Xafiiska Wararka Addis Ababa