Laascaanood (Caasimada Online) – Wararka ka imaanaya gobolka Sool ayaa sheegaya in abaabul dagaal uu ka socda degaanka Oog oo ka tirsan gobolkaas.
Xog aan helnay ayaa sheegaysa in ciidamada militariga Somaliland oo kaashanaya ciidamo deegaanka ah oo aad u hubeysan ay dhaqdhaqaaqyo ka bilaabeen degaanka Oog kuwaas oo qorsheynaya sidii ay u weerari lahaayeen fariisimaha Ciidanka SSC-Khaatumo ay uga sugan yihiin gobolkaa Sool..
Dhinaca kale, ciidamada SSC-Khaatumo ayaa iyagana ku sugan deegaanka Guumeys oo ilaa 10 km u jira degankaa Oog ee gobolka Sool, waxayna wararku sheegayaan inay u diyaarsan yihiin sidii ay uga hortagi lahaayeen abaabulka dagaal ee ay wadaan ciidamada Somaliland iyo kuwa degaanka.
25-ka bishii Agoosto ayaa ciidamada Somaliland khasaare isugu jira dhimasho iyo dhaawac lagu soo gaarsiiyay weerar ka dhacay saldhigyadii ay ku lahaayeen Gooja Cadde iyo Maraaga, kuwaas oo laga qabsaday.
Qoraal ka soo baxay Hay’adda caalamiga ah ee Laanqayrta Cas (ICRC) ayaa lagu sheegay in Somaliland iyo xoogagga SSC-Khatumo ay dagaalka ku kala qabsadeen boqolaal maxaabiis ah, iyadoo ICRC ay soo booqatay 300 oo maxbuus oo xooggaga Khatumo ay qabteen.
Sidoo kale waxay hey’adaan xaqiijisay in dadkaas ay ku jirin afar maxbuus oo dhaawacyo qaba kuwaas oo loo gudbiyey isbitaalka, waana markii ugu horeysay oo laga soo waramay tirada iyo aragtida ciidamadii Somaliland ee u gacan galay SSC.
ICRC ayaa sidoo kale sheegtay in 43 mayd laga soo ururiyey toddobaadkii lasoo dhaafay jiidda hore ee dagaalladii ugu dambeeyey ee ka dhacay magaalada Laascanood.
