Kismaayo (Caasimada Online) – Dowladda federaalka Soomaaliya ayaa ballaarisay cunaqabateynta saaran maamulka Jubaland oo markii hore ku koobneed dhinaca duulimaadka oo kaliya.
Caasimada Online ayaa ogaatay in dowladda federaalka Soomaaliya ay cunaqabateynta Jubaland ku kordhisay ilaa afar heer oo kale oo cunaqabateyn ah, kuwaas oo ay ka dhalan karto dhibaatooyin daran oo saameeya shacabka degaanka.
Shirkii ugu dambeeyay ee golaha wasiirada Soomaaliya ayaa lagu go’aamiyay in la kordhiyo cadaadiska Jubaland waxaana lagu daray afartaan qodob oo kale ah.
- Gabi ahaanba waxaa la joojiyay wadashaqeynta wasiirada xukuumadda Kheyre kala dhaxeysay wasiirada kale ee maamulka Jubaland ilaa inta laga xalinayo khilaafka labada dhinac.
- Waxaa meesha laga saaray in maamulka Jubaland la siiyo lacago maamul gobaleedyada loo soo marsiiyo dowladda dhexe ee Soomaaliya, taas oo ay helaan maamulada oo dhan, marka laga reebo Galmudug oo ku jirta soo kabasho iyo dhismaha maamul cusub.
- Dowladda Soomaaliya waxay si KMG ah hakad u gelisay dhamaanba mashaariicdii hormarineed ee Jubaland, oo ay ku jiraan dhismaha saldhigyo ciidan iyo adeegyo kale oo dheeraad ah hadii la helo iyo kuwii hadda socday.
- Iyo go’aanka ugu dambeeyo oo ah in la joojiyo dhamaan tababarada, taageerada iyo ka warqabka ciidamada ku sugan Jubaland ee aan ka amar qaadan dowladda federaalka Soomaaliya, ilaa inta laga xalinayo khilaafka taagan.
Go’aanadaan oo lagu gaaray shirkii ugu dambeeyay ee golaha wasiirada, ayaa lagu darin waxyaabihii ay xukuumadda faah faahisay markii uu shirkooda soo dhamaaday, waxaana dibad joog ka ahaa dhamaan wixii aan ka tirsaneyn golaha wasiirada, sida kaamira-maanada, shaqaalaha xafiiska ra’iisul wasaaraha iyo xog-heynida oo dhan.
Xubno ka tirsan golaha wasiirada Soomaaliya ayaa Caasimada Online u sheegay in arrintaan ay saarnaan doonto Jubaland muddo dhowr bil ah, kadibna lagu dari doono cunaqabateyno kale oo intaan ka ballaaran sida ay noo sheegeyn qaar kamid ah wasiirada goobta joogay.
Caasimada Online
Xafiiska Muqdisho
caasimada@live.com
