Muqdisho (Caasimada Online) – Waxaa soo baxaaya warar hoose oo sheegaya in khilaaf hoosaad uu mar kale ka dhex curtay Madaxweynaha dowlada federaalka Maxamed C/llahi Farmaajo iyo Guddoomiyaha baarlamaanka Maxamed Sheekh Cusmaan Jawaari.
Khilaafka labada mas’uul ayaa yimid kadib markii Guddoomiyaha baarlamaanka uu ka biya diiday tallo uu usoo jeediyay Madaxweynaha dalka.
Khilaafka oo aan sidaa usii baahin ayaa waxaa la sheegay inuu ka dhashay arrimaha Xildhibaanada gadoodsan ee ku sugan magaalada Nairobi kadib markii Jawaari uu Farmaajo ku cadaadiyay inuu kala maareeyo Xildhibaanada.
Farmaajo ayaa diiday in Xildhibaanada lagu qanciyo kuraas, dhaqaale iyo ballamo, waxa uuna taa bedelkeeda sheegay inay muhiim tahay in cid waliba ay u hogaansanaato ka qeybqaadashada dhismaha dalka iyo sharciyadiisa.
Guddoomiyaha baarlamaanka ayaa si dadban u taageersan Xildhibaanada baarlamaanka waxaana xusid mudan in socdaalkiisa magaalada Nairobi uusan natiijo kala soo laaban Xildhibaanada loo diray.
Xildhibaanada ugu badan ayaa ka tirsan garabka Guddoomiyaha baarlamaanka, gaar ahaan garabkii kasoo horjeeday meelmarinta Ra’isul wasaaraha magacaabidiisa kadib.
Si kastaba ha ahaatee, waxaan muuqan isku soo dhawaansho ka dhexeysa labada mas’uul markii laga soo tago shaqooyinka Qaranka ee ka dhexeeya.
Caasimada Online
Xafiiska Muqdisho
[email protected]