Berbera (Caasimada Online) – Garoonka diyaaradaha Berbera ayaa waxaa haatan ka socda mashruuc ballaaran oo lagu dhisayo saldhig milatari oo la sheegay inay si wadajir ah u adeegsan doonaan Mareykanka, Israa’iil iyo Isutagga Imaaraadka Carabta.
Mashruucan ayaa la rumeysan yahay inuu qayb ka yahay isbeddel istaraatiiji ah oo ka socda gobolka Geeska Afrika iyo Badda Cas, xilli ay sii xoogeysanayaan tartanka quwadaha caalamiga ah.
Sida ay sheegayaan ilo xog-ogaal ah, qorshaha ugu weyn ayaa ah in garoonka Berbera oo hadda ay isticmaalaan diyaaradaha rayidka, si tartiib tartiib ah loogu beddelo xarun milatari oo istaraatiiji ah. Garoonkan ayaa la filayaa inuu noqdo saldhig muhiim u ah hawl-gallada dhinaca cirka iyo saadka ee quwadaha ku lugta leh mashruucan.
Xogaha la helay waxay muujinayaan in dhismaha iyo ballaarinta xaruntaasi ay si joogto ah u socdeen muddo ku dhow 10 bilood. Inta lagu guda jiray muddadaas waxaa la sheegay in la dhisay xarumo cusub, goobo amni iyo kaabayaal kale oo la xiriira adeegyada milatariga, inkastoo aan si rasmi ah loo shaacin nooca dhismayaasha la hirgelinayo.
Tan iyo markii uu mashruucan billowday, waxaa si weyn loo adkeeyay ammaanka garoonka. Ilo deegaanka ah ayaa sheegaya in si adag loo xaddiday gelitaanka garoonka, isla markaana gebi ahaanba la xiray waddadii ugu weyneyd ee loo mari jiray, iyadoo dhaq-dhaqaaq kasta oo ka ag dhow garoonka lagu soo rogay kormeer iyo xannibaado amni.
Garoonka Berbera wuxuu ku yaallaa xeebta Gacanka Cadmeed, meel aan ka fogeyn marin-biyoodka Bab al-Mandab oo ka mid ah marin-biyoodka ugu muhiimsan caalamka.
Goobtan ayaa muhiimad weyn u leh isku socodka maraakiibta ganacsiga iyo kuwa milatariga, taasoo ka dhigeysa saldhig kasta oo halkaas laga dhiso mid leh qiime istaraatiiji ah.
Arrintan ayaa imanaysa xilli Israa’iil ay bishii December 2025 qaaday tallaabo aan hore loo arag oo ay ku aqoonsatay madaxbannaanida ay ku doodo Somaliland. Aqoonsigaas ayaa xilligaas dhaliyay falcelin siyaasadeed iyo mid diblomaasiyadeed oo ka timid dalal iyo dhinacyo kala duwan, iyadoo Dowladda Federaalka Soomaaliya meel adag iska taagtay xad-gudubkaasi.
Sida ay tilmaamayaan xogaha sirdoon ee la helayo, saldhiggan ayaa loogu talagalay inuu noqdo xarun laga fuliyo hawl-gallo oo u dhow Yemen, halkaas oo xoogagga Xuutiyiinta ay weerarro ka dhan ah Israa’iil ka bilaabeen dabayaaqadii bishii Maarso.
Ilo xog-ogaal ah ayaa sidoo kale sheegaya in Isutagga Imaaraadka Carabta uu hormuud ka yahay hirgelinta mashruucan, isagoo ka duulaya heshiis iskaashi oo dhinaca difaaca ah oo maamulka Somaliland uu la galay sanadkii 2017. Heshiiskaas ayaa hore u horseeday ballaarinta dekedda Berbera iyo mashaariic kale oo istaraatiiji ah oo gobolka laga fuliyay.
Mareykanka iyo Israa’iil ayaan ilaa hadda si rasmi ah uga hadlin wararka la xiriira saldhigga la sheegay inuu ka socdo Berbera, sidoo kale ma jirto wax faahfaahin ah oo ay Somaliland ama Imaaraadka Carabta ka bixiyeen xogahan.