Muqdisho (Caasimada Online) – Dowladda Imaaraadka Carabta ayaa si weyn u beenisay inay Soomaaliya kala baxday safiirkii u fadhiyey sababo xagga xiriirka Soomaaliya iyo Imaaraadka oo xumaaday kadib markii ay arrintaas soo baxday.
Sidoo kale imaaraadka ayaa beeniyey inuu safiirkooda ka shaqeenayo isku dirka dhinacyada kala duwan ee Soomaaliya ka kooban tahay kadib markii lagu eedeeyey inuu Maamula Goboleedyada heshiisyo aan sharci aheyn la galayo.
Mid kamid ah Saraakiisha Safaaradda Imaaraadka ee Muqdisho oo saxaafadda la hadlay ayaa sheegay inaysan jirin hadalada dhawaan la isla dhexmarayey ee ahaa inay Imaaraadka kala baxday safiirkii Soomaaliya ee Mohammed Ahmed Othman Al Hammadi.
Qaar kamid ah warbaahinada Soomaalida iyo kuwa caalamka ayaa dhawaan shaaciyey inuu Al Hammadi dib ugu noqday Imaaraadka Carabta isla markaasna ay taas sabab u aheyd diidamadii ka timaaday dowladda ee heshiiskiis Berbera.
“ Safiirkeena wuxuu goob joog u ahaa xafladdii caleema saarka madaxweyne Farmaajo, waa been hadalada sheegayo inuu safiirka uga baxay Soomaaliya xiriir xumaaday awgiis, wuxuu u baxay arrimo shaqo gaar ah, dhawaan ayuu xafiiskiisa kusoo laaban doonaa, waxaana idiin xaqiijinayaa inuusan xumeyn xiriirka Soomaaliya iyo Imaaraadka” ayuu saxaafadda u sheegay sarkaalkaan imaaraadka kasoo jeedo ee Muqdisho ku sugan.
Walaacaan iyo hadaladaan ayaa imaaday markii Bishii February ay Imaaraadka heshiis rasmi ah la gashay Maamulka Somaliland kaasoo ahaa inay saldhig military ka sameystaan Berbera, waxaana heshiiskaas ka hor imaaday madaxweyne Farmaajo oo Sacuudiga dacwad u gudbiyey.
Dowladda Dhexe ee Soomaaliya, ayaa Imaaraadka ku tilmaamtay in shaki galineyso madaxbanaanida Qaranimada Soomaaliya, waxaana dowladda ay muujisay sida aysan ugu qanacsaneen saldhiga military, oo aysan ka warqanin dowladda.
Xildhibaanada Baarlamaanka Federaalka ah ee Soomaaliya ayaa wada mooshin ka dhan ah Saldhiga Milateri ee Imaaraadka carabta ka sameysaneyo magaaladda Berbera ee Somaliland.
Sidoo kale waxay ka dhawaajiyeen inuusan safiirkooda ka shaqeeneyn sidii uu soomaalida isugu diri lahaa balse uu halkaas u joogo sidii Imaaraadka iyo Soomaaliya isugu dhaafsan lahaayeen danooyin siyaasadeed.
Hadalka kasoo yeeray Imaaraadka Carabta ayaa muujinayo inay doonayaan sidii loo damin lahaa xasarada ka dhex bilaabatay labad dowladood midaana waxay u ogtahay inay tahay tallaabo ay ku dooneyso in khilaafka xal lo helo.
Caasimada Online
Xafiiska Muqdisho
[email protected]