Jabuuti (Caasimada Online) – Dowladda Jabuuti ayaa martigelisay shir heer sare ah oo lagu falanqeeyay khataraha badda, iyada oo garab ka helaysa waddamada Japan iyo Midowga Yurub.
Shirka ayaa xoogga lagu saaray sidii si mideysan looga hortagi lahaa burcad-badeedda, dhibaatooyinka deegaanka, iyo caqabadaha amni ee saameeya gaadiidka badda.
Shirka oo ka dhacay magaalada Jabuuti, waxaa si wadajir ah u soo qaban-qaabiyay wasaaradaha arrimaha dibadda, gaadiidka iyo kaabayaasha, iyo deegaanka ee dalkaas. Ujeedada ugu weyn ee shirkan ayaa ahayd in la dhiso hannaan iskaashi oo caalami ah si loo yareeyo khataraha ka imaanaya badda, isla markaana loo ilaaliyo amniga ganacsiga iyo deegaanka.
Wakiillo sare oo ka kala socday hay’adaha dowladda Jabuuti, ururka IGAD, Japan, iyo Midowga Yurub ayaa kasoo qeyb-galay. Danjiraha Japan ee Jabuuti, Hara Keiichi, ayaa ku tilmaamay shirkan inuu yahay madal muhiim ah oo ay dowladuhu si wadajir ah ugu midoobayaan badbaadinta badda iyo horumarinta iskaashi wax-ku-ool ah.
Danjiraha Midowga Yurub, Denisa Elena, ayaa dhankeeda bogaadisay dadaalka Jabuuti, iyadoo sheegtay in shirkan uu diiradda saaray arrimo waaweyn oo ay ka mid yihiin ilaalinta deegaanka, la-dagaalanka burcad-badeedda, iyo xoojinta amniga marin-biyoodka istiraatiijiga ah ee gobolka.
Wasiirka Gaadiidka ee Jabuuti, Xasan Xaamud ayaa xusay in dalkiisu uu mar walba ka go’an yahay sugidda amniga badda, maadaama uu ku yaallo meel istiraatiiji ah oo muhiim u ah ganacsiga caalamiga ah. Wuxuu sidoo kale ammaanay taageerada joogtada ah ee ay bixiyaan Midowga Yurub, Japan, iyo IGAD.
Shirkan ayaa muujinaya baahida loo qabo iskaashi ballaaran oo caalami ah si loo xakameeyo khataraha badaha, iyadoo lagu dardargelinayo dadaallada lagaga hortagayo burcad-badeedda iyo waxyeellada deegaanka, laguna xoojinayo amniga marin-biyoodka muhiimka ah ee Geeska Afrika.