Washington (Caasimada Online) – Madaxweynaha Mareykanka, Donald Trump, oo qoraal xasaasi ah soo saaray ayaa si deg-deg ah uga jawaabay ansixinta qaraarka lagu xadidayo awoodihiisa ee dagaalka Iiraan, kaas oo ay soo saareen odayaasha Aqalka Senate-ka Mareykanka, fiidnimadii Talaadada.
Trump oo qoraal soo geliyay bartiisa bulshada ayaa shaaca ka qaaday in go’aanka Aqalka Senate-ka uu kusoo aaday xilli xun, isla markaana qaraarkooda uu yahay mid aan macno badan lahayn.
Sidoo kale, wuxuu intaas ku daray in uusan ku faraxsaneyn go’aanka soo baxay, isaga oo dhanka kale farriin cad u diray dowladda Iiraan.
Farriinta uu Trump ku baahiyay bartiisa bulshada ayaa u qornayd sidan:-
“Waxaan Iiraan geliyay meel ay si buuxda cadaadis ugu jirtay, diyaar u ahayd inay dib u laabato, oo ay ku dhowaad wax walba na siiso. Markii ugu horreysay muddo tobanaan sano ah, Iiraan waxay ixtiraam badan u haysay dowladda Mareykanka iyo madaxweynaheeda, oo ah aniga. Laakiin Aqalka Senate-ka Mareykanka ayaa go’aansaday waqtigii ugu xumaa, iyadoo cod aan macno lahayn lagu qaaday Xeerka Awoodaha Dagaalka, inay farriin u diraan dowladda ugu weyn adduunka ee maalgelisa argagixisada in Mareykanku uusan ku faraxsanayn tallaabooyinka aan ka qaadayo oo aan joojiyo. Waxay taageero u fidinayaan cadowga.
Afar ka mid ah Jamhuuriyiinta laga badiyay ayaa codkooda ku biiriytay Dimuqraadiyiinta, ‘Maxay codkani ka dhigan tahay?’ Senetaradani waxay shaqadayda ka dhigeen mid adag, laakiin shaqada waan qaban doonaa, wax kasta haa igu qaadato, sababtoo ah taasi waa waxa aan had iyo jeer sameey”!
Sida aan horey u sheegnay, Aqalka Senate-ka Mareykanka oo ay Jamhuuriyiintu ku leeyihin aqlabiyadda, ayaa Talaadadii taageeray hindise sharciyeed lagu joojinayo tallaabada milatari ee Mareykanka uu ka qaadayo Iiraan, laakiin weli ma cadda saameynta uu sharcigan ku yeelan doono dagaalka, gaar ahaan iyadoo maamulka Madaxweynaha Mareykanka Donald Trump uu ka gorgortamayo heshiis nabadeed oo uu la galayo Jamhuuriyadda Islaamiga ah ee Iiraan.
Aqalka Senate-ka ayaa u codeeyay 50-48 si ay u taageeraan qaraarka wadajirka ah, kaas oo horey u ansixiyay Aqalka Wakiilada horraantii bishan.
Ra’yi ururinta ayaa muujinaysa walaac sii kordhaya oo ku saabsan dagaalka Iiraan, walaacyadaas oo xitaa dareemayaan qaar ka mid ah xubnaha Jamhuuriyiinta taageersan Mr. Trump.
Dagaalkan, oo bilaabmay Febraayo 28, isla markaana aanay taageersaneyn inta badan dadweynaha Mareykanka, ayaa weli waxaa socda heshiiskiisa rasmiga ah.