Kismaayo (Caasimada Online) – Madaxweynaha dowlad-goboleedka Jubbaland Axmed Maxamed Islaam (Madoobe) ayaa maanta shir-gudoomiyay kulanka golaha wasiirada oo lagaga hadlay qodobo ay kamid yihiin.
Kulanka golaha ayaa lagu cambaareeyay wax loogu yeeray “fara-galinta kooxda Xasan Sheekh Maxamuud ay ka wado gobolka Gedo”, iyadoo dowladda dhexe ku eedeysay dagaalkii u dambeeyay ee ka dhacay xarunta gobolkaasi, kaas oo uu ka dhashay khasaare dhimasho iyo dhaawac leh.
“Golahu wuxuu uga tacsiyeeyay ehelada dadkii ku waxyeeloobay dhacdadan foosha xun sidoo kalana ay dabo socdaan abaabulo beelaha Degmada la isku hubaynayo taas oo masuuliyada waxa ka dhasha ayna cidna la wadaagi doonin Kooxda Xasan Sheekh Maxamuud,” ayaa lagu yiri bayaan kasoo baxay golaha.
Sidoo kale waxaa golahu uu ka digay abaabulka hubaysan ee ka socda degmooyinka Garbahareey iyo Beledxaawo, kuwaas oo sababi kara colaado daba dheeraada iyo in dhiig uu ku daato, iyadoo masuuliyada wixii ka yimaadana ay dowladda Xasan Sheekh qaadi doonto, sida lagu yiri qoraalka.
Waxaa kale oo goluhu ka hadlay xayiraadaha duulimaadyada oo si toos ah u saamaynaya shacabka ree Jubbaland, islamarkaana aan ilaa hada saamayn ku yeelanin masuuliyiinta iyo madaxa dowladda Jubbaland, taas oo ay sheegeen inay muujinayso cadaawada iyo nacaybka dowladda Xasan Sheekh u qabto shacabka reer Jubbaland oo meelo badan oo kamid ah wali ay xayiran yihiin duulimaadyadooda.
Golaha ayaa sidoo kale bogaadiyay guulaha ay ciidamada maamulka Puntalnd ka gaareen dagaalka argagixisada caalamiga ah ee Daacish, iyadoo loo baahan yahay in aan loo kala harin garab istaaga dowladda iyo shacabka Puntland si looga adkaado kooxda Daacish.
Ugu dambayntii golaha ayaa ka digay, islamarkaana ogaysiiyay dhammaan bulshada Soomaaliyeed in jahada dalka uu ku socdo ay tahay mid halis ah oo god dheer ku ridi karta xasiloonida dalka.
“Colaadaha iyo duulaanada qaawan ee ay abaabulayaan kooxda Xasan Sheekh waa kuwo aan u adeegaynin danta dadka iyo dalka hadii hada aan la daba qabanina Soomaaliya ay gaari karto meel halis ah,” ayaa lagu yiri bayaanka kasoo baxay maamulka Jubbaland.
