CC SHAKUUR oo digniin u diray dowladda Somalia

By Asad Cabdullahi Mataan

Muqdisho (Caasimada Online)-C/raxmaan Cabdi Shakuur Warsame oo siweyn u dhaliilsan hanaanka siyaasadeed ee dowladda Soomaaliya ayaa digniin u diray madaxda dowladda Soomaaliya.

Hogaamiyaha Xisbiga Wadajir oo kasoo muuqday muuqaal kooban oo uu soo dhigay Bartiisa Facebook ayuu kaga hadlay safarka uu maanta ku imaanayo magaalada Muqdisho iyo digniintiisa.

Wuxuu sheegay in maanta sida qorshaha uu ahaa inuu imaan doono magaalada Muqdisho, isaga oo kasoo duulayo magaalada Nairobi ee dalka Kenya oo muddooyinkii ugu dambeeyay uu ku sugnaa.

Wuxuu kaga digay dowladda Soomaaliya inay carqaladeyso dadka doonaya inay soo dhaweeyaan siyaasiga, waxaana uu sheegay inay hayaan xogaha ku aadan in la doonayo in dadkaasi laga hor istaago inay soo dhaweeyaan.

“Waxaan uga digayaa dowlada Federaalka inay carqaladeyso soo dhaweynteyda oo aysan baal marin dimuqraadiyadda”ayuu yiri C/raxmaan Cabdi Shakuur oo ku sugnaa garoonka diyaaradaha ee magaalada Nairobi.

Siyaasiga ayaa dhaqaalo badan ku bixiyay in dadweyne badan ka qeyb galaan soo dhaweyntiisa, isagoo idaacaddo gaar ah siiyay lacag ay kusii baahinayaan in dadweynaha ka qeyb galaan soo dhaweyntiisa.

La soco waxii kusoo Kordhaa Insha allah

Caasimada Online
Xafiiska Muqdisho
Caasimada@live.com