Balidoogle (Caasimada Online) – Ciidanka 152-aad ee Taageerada Injineerada (152nd Engineer Support Company), oo ka tirsan howlgalka wadajirka ah ee ciidamada Mareykanka, Combined Joint Task Force – Horn of Africa (CJTF-HOA), ayaa door muhiim ah ka ciyaaraya xoojinta howlgallada milatari iyo horumarinta nolol maalmeedka ciidamada ku sugan garoonka diyaaradaha milatariga ee Balidoogle (BMA), ee gobolka Shabeellaha Hoose ee Soomaaliya.
Waxay hadda wadaan mashaariic dhisme oo ay ku jirto dhismaha saldhig caafimaad oo cusub.
Kooxdan injineerada ah waxay ka faa’iideysteen khibrad ay ka heleen waayo-aragnimo rayid ahaan iyo waajibaadyo hore oo milatari, taasoo si weyn uga caawisay inay si wax-ku-ool ah uga gudbaan caqabadaha dhabta ah ee ka jira goobta.
“Waxaan aaminsanahay in ay aad muhiim u tahay in aan ka shaqaynay sidii aan uga gudbi lahayn caqabadaha tirada badan ee hor taagnaa dhismaha saldhigga caafimaadka,” ayuu yiri S/Guuto Liam Harris, oo ah hoggaamiyaha kooxda alwaaxda ee mashruuca saldhigga caafimaadka.
Saldhiggan caafimaad wuxuu u suurtagelinayaa ciidamada inay helaan daryeel caafimaad oo degdeg ah oo badbaadin kara noloshooda, taasoo sare u qaadaysa awoodda saldhigga Balidoogle (BMA) inay noqoto xarun milatari oo joogto ah. Sidoo kale, wuxuu horumarinayaa diyaar garowga howlgaleed, si ciidamada ay u sii wataan hawshooda sugidda amniga Bariga Afrika.
Marka laga soo tago mashruuca caafimaadka, kooxda injineerada waxay sidoo kale ka shaqeynayaan mashaariic kale oo lagu horumarinayo nolol maalmeedka gudaha saldhigga. Mashaariicdan waxaa ka mid ah dhismo guryo cusub iyo mashaariic kor loogu qaadayo awoodda difaaca, kuwaasoo si gaar ah diiradda u saaraya daryeelka iyo amniga ciidamada ku sugan Balidoogle.
Doorka injineerka ma ahan oo kaliya farsamo aqooneed, balse wuxuu u baahan yahay karti, la-qabsasho iyo wada shaqeyn kooxeed.
Iyagoo ka shaqeynaya jawi adag oo ay ka mid tahay kulaylka daran ee Soomaaliya, kooxda injineerada waxay si joogto ah u muujiyaan qiyamka milatariga ee ku saleysan adkaysi, hal-abuur iyo go’aan adag, si loo dhiso loona ilaaliyo kaabeyaasha muhiimka u ah howlgalka iyo nolosha ciidamada.
“Injineeradu waa saldhigga ciidanka,” ayuu yiri S/Guuto Roberts, hoggaamiyaha waax ka tirsan 152-aad. “Goob kasta oo howlgal ka socdo, waxa loo baahan yahay meel lagu seexdo, lagu cunteeyo, lana helo amni – waana taas waxa aan bixinno. Anagaa tiirka hoose ee dhismaha ciidanka.”
