Muqdisho oo dib ugu laabtay xaal hore (Maxaa ugu wacan dilalka qorsheysan, maxaase dhacay caawa?)

By Asad Cabdullahi Mataan

Muqdisho (Caasimada Online) – War goordhow nasoo gaaray ayaa sheegaya in Kooxo ku hubeysnaa Bastoolado ay Caawa dil ka geysteen Degmada Xamar Jajab ee Gobolka Banaadir gaar ahaan xaafada Buulada.

Marxuumka la dilay ayaa waxaa lagu magacaabi jiray Nuur Cali Isxaaq, waxaana la sheegay in lagu dhex dilay Hooygiisa.

Marxuumka ayaa horay uga tirsanaan jiray Ciidamada Xooga, balse waxaa la xaqiijiyay in iminka uu ahaa Shacab isla markaana ka tagay shaqada ciidanimo.

Kooxo ku hubeysnaa Bastoolado ayaa sidoo kale gelinkii dambe ee maanta dilay Hooyo lagu magacaabi jiray Shamsa Xaaji oo kamid aheyd Haweenka nadaafadda Gobolka Banaadir.

Hooyadaani ayaa waxa uu dilkeeda ka dhacay Degmada Yaaqshiid ee Gobolka Banaadir, xili ay ku guda jirtay shaqada ay u heysay Qaranka.

Magaalada Muqdisho ayaa waxaa maalmahaani dambe ka dhacaayay dilal loo geysanaayo dadka shacabka iyo Shaqaalaha Dowlada, mana jirto cid ka hadasha dilalka joogtada ah ee ka dhaca magaalada Muqdisho.

Caasimada Online
Xafiiska Muqdisho
Caasimada@live.com