Doon laga lahaa dalka Yemen oo lagu Afduubta Xeebaha Maamulka Puntland

By Asad Cabdullahi Mataan

Garoowe (Caasimada Online)-Kooxo ka tirsan Burcad-badeeda Somalia ayaa Afduubtay Dooni siday Alaabo oo kusoo jeeday Xeebaha Somalia.

Doonidaani ayaa la sheegay in laga lahaa dalka Yemen, waxa ayna Kooxdaasi ku Afduubteen Xeebaha degmada Eyl gobolka Nugaal.

Saraakiil ka tirsan Ciidamada Badda maamulka Puntland ayaa shaaca ka qaaday in Doonidaasi la afduubtay isla markaana lala soo aaday Xeebaha Puntland.

Saraakiisha ayaa intaa ku daray in Doonida ay la socdeen ilaa 10 Shaqaale waxa ayna cadeeyen inay ku howlan yihiin gacan ku dhigida Doonida.

Waxa ay intaa kusii dareen Saraakiisha inay diyaariyeen Ciidamo aad u xoogan oo ujeedkooda uu yahay furashada Doonida.

Degmada Eyl ee gobolka Nugaal oo ay dhacdaan ka dhacday ayaa waxaa kusii jeeda ciidamo ka tirsan maamulka Puntland.

Dhinaca kale, Burcad-badeedka geystay Afduubka Doonidaani ayaa tirro ahaan lagu sheegay ilaa 9 Burcad-badeed oo hubeysan.

Caasimada Online
Xafiiska Garoowe
Caasimada@live.com