Muqdisho (Caasimada Online) – Madaxweyne Farmaajo ayaa isbadalkii ugu ballaarnaa tan iyo markii uu xilka qabtay waxa uu ku sameeyey Maxkamadda Sare ee dalka.
Madaxweynaha oo dhawaan u magacaabay xilka Guddoomiyaha Maxkamadda Sare nin dhallinyaro ah ayaa maantana soo saaray wareegto uu xilka kaga qaaday guud ahaan Garsooreyaashii Maxkamadda Sare oo tiradoodu ahayd lix xubnood kuwaas oo kale ahaa;
Sheekh Abuukor Cismaan Macalin Daahir, Maxamed Maxamuud Maxamed, Maxamuud Axmed Faarax, Sheekh Cumar Aadan Maxamed, Cabdinaasir Seeraar Axmed iyo Axmed Maxamed Sheekh Ibraahim.
Farmaajo ayaa magacaabay 5 xubnood oo kaliya kuwaas oo laga soo kala xulay Garyaqaanno la sheegay in muddadii la soo dhaafay qiimeyn gaar ah lagu waday shaqadooda.
Garsooreyaasha cusub ayaa qaarkood dhawaan waxaa laga qaaday xilal ay ka hayeen Maxkamadaha Gobolka Banaadir, taas oo looga gollahaa in loo dallacsiiyo Maxkamadda Sare ee Dalka.
Haddaba Akhriso magacyada 5-ta Garsoore ee loo magacaabay Maxkamadda Sare:
– Garyaqaan Saalax Sheekh Ibraahim Dhiblaawe.
– Garyaqaan Maxamed Cumar Axmed.
– Garyaqaan Cabdalle Macalin Maxamed.
– Garyaqaan Xaydar Barqash Abukor.
– Garyaqaan Axmed Cali Muuse.
Madaxweyne Farmaajo ayaa ku adkeeyey garsooreyaasha uu magacaabay in ay dhawraan sarreeynta sharciga dalka iyo in ay si siman ugu adeegaan shacabka.
