Muqdisho (Caasimada Online) – Roobabkii xalay ka da’ay Muqdisho oo gaystay burbur iyo waxyeello xooggan ayaa dhaliyay dhalleeceyn xooggan oo lagala dul dhacay maamulka gobolka, inkasta oo waxa dhacay ay yihiin musiibo dabiici ah.
Si kastaba ha ahaatee, xitaa haddii ay noqoto in cid dusha loo saaro wixii dhacay oo xag rabbaani ah ka yimid, ma yahay gobolka Banaadir gobol madax-bannaan oo arrimihiisa si iskiis ah u maamula, si loola xisaabtamo?
Xaqiiqda waxay tahay in gobolka Banaadir uu la haysto u yahay dowladda federaalka. Waa maamul aan go’aannadiisa, dakhligiisa iyo amnigiisa u madax-bannaanayn, sida aan wada ognahay.
Haddii xaaladda ka taagan Xamar ay jirto cid lagu eedeynayo, waa Villa Somalia iyo dowladda federaalka, sababtoo ah iyagaa maamula magaalada oo mar walba cidda ay rabaan u dhiibta.
Arrintan waxaa si wanaagsan u ifiyey agaasimihii hore ee Madaxtooyada Soomaaliya, Cabdinuur Maxamed Axmed, oo qoraal soo dhigay Facebook. Hoos ka akhri.
Waligaa ma maqashay Wasiiradii Maaliyadda ee 12kii sano ee lasoo dhaafay kala dambeeyay oo mid walba leeyahay dakhliga gudaha ee dalka ayaan sare u qaadnay? IMF iyo Baanka Adduunka ayaa nagu ammaanay kordhinta Dakhliga gudaha?
Haa, waa run waayo dakhliga gudaha ee Dowladda Federaalka ee la sheegayo waa kan Gobolka Banaadir, gaar ahaan Dekedda, Garoonka iyo labada suuq ee Bakaaro iyo Suuq Bacaad. Dhaqaalahaas soo xaroodo ayuu Gobolka Banaadir ku leeyahay 15% oo kaliya. Hadda waa 15% kaliya!
Inta yarta ah ee Gobolka loo gooyo (15%) nus kamid ah waxaa la siiyaa La-taliyeyaal iyo shaqaale leexsan oo ku xiran isla Xafiisyada Dowladda Federaalka, gaar ayaan Madaxtooyada iyo Ra’iisul Wasaaraha. Guddoomiyoow ninkaan iga meelee, walaaloow halkaan kirada ka bixi, midkaan qandaraas sii, midkaanna waa i dhibaye iga aamusi. Waaba intaas. Rukub!
Maba jiri karto dhaqaale nadaafad iyo horumar looga shaqeeyo oo usoo haray. Waa sababta aadan u arki doonin kol dhaw Duq Caasimad oo doorasho ku yimid oo u madaxbannaan horumarinta amuuraha gobolkiisa. Xitaa Madaxweyne goofka kasoo jeeda diyaar uma aha inuu qalinkiisa wax qori waayo!
Hadda ma fahamteen sababta Wareegto Madaxweyne gobolka loogu magacaabo hoggaankiisa?
Sirtu waa dhacdhaca iyo dheefta ee maha qofka la magacaabay inuu hawlgab yahay!!!