New York (Caasimadda Online) – Magaalada New York waxaa maanta la filayaa inuu ka qabsoomo shir ay xubnaha Golaha Ammaanka Qaramada Midoobay ka yeelanayaan xaaladda Soomaaliya.
Kulankaan looga hadlayo xaaladda ka jirta Soomaaliya oo walaac laga muujino, waxaa ka qeyb galaya wakiilka Qaramada Midoobay u fadhiya Soomaaliya (James Swan), kaas oo ka warbixin doona xaalad walba oo ku gadaaman dalka Soomaaliya, gaar ahaan arrimaha ka taagan doorashooyinka.
James Swan ayaa la filayaa inuu Golaha ku wargeliyo khilaafka u dhexeeya dowladda federaalka iyo mucaaradka ee la xiriira guddiyada doorashooyinka ee uu dhowaan dhisay Ra’iisul Wasaaruhu ayna diideen mucaaradka iyo Guddoomiyaha Aqalka Sare ee Baarlamaanka.
Dhawaan ayey aheyd markii Qaramada Midoobay ay dowladda Soomaaliya ugu baaqday inay wax ka qabato saddex waxyaabood oo ku gudban doorashada dalka, waxaana la filayaa inuu war culus kasoo baxo kaas oo ku saabsan doorashooyinka lagu wado inuu dalka galo.
Golaha Amniga ee Qaramada Midoobay ayaa la filayaa inay ugu baaqaan dowladda federaalka inay tixgeliso cabashooyinka mucaaradka lanala sameeyo guddi cusub oo lagu heshiiyo oo hirgeliya doorashooyinka.
In ka badan 10 musharax madaxweyne oo ku shiray magaalada caasimada ah ee Muqdisho, ayaa diiday hay’adaha doorashooyinka ee uu dhawaan magacaabay ra’iisul wasaaraha, Maxamed Xuseen Rooble, iyagoo sheegay in aysan dhexdhexaad ahayn.
Musharaxiinta mucaaradka waxey xukuumadda hadda jirta ku eedeeyeen iney saraakiil ciidan, shaqaalaha madaxtooyada iyo taageerayaal dowladda ah ka buuxisay guddiga, taasna aysan sharciga waafaqsaneen.
Si kastaba waxaa la sugi doonaa warka culus ee kasoo bixi doona kulanka ay maanta ku yeelanayaan New York, golaha amniga ee qaramada Midoobay.