Muqdisho (Caasimada Online) – Guddoonka Golaha Baarlamaanka Somalia ayaa ku baaqay in si dhaqsi ah lagu soo dhiso Golaha Wasiirada ee Xukuumada Somalia.
Guddoomiye Ku-xigeenka 2aad ee BFS Mahad Cabdalla Cawad ayaa sheegay in Guddoonka Golaha Shacabka uu Madaxweynaha iyo Ra’isul wasaaraha ka doonaayo inay ka jawaab bixiyaan dib u dhacyada baahsan ee ku imaanaya ku dhawaaqida Golaha Wasiirada.
Mahad Cabdalla Cawad, ayaa sheegay in leyskala soo gudbay xiliga loo qabtay Madaxweynaha iyo Ra’isul wasaaraha inay kusoo magacaaban Golaha Wasiirada Xukuumada Somalia.
Mahad Cabdalla Cawad, waxa uu sheegay in Guddoonka Golaha Shacabka ay Ra’isul wasaaraha si deg deg ah uga dalbanayaan inuu ku soo dhiso Xukuumada, waxa uuna cadeeyay in wakhti badan lagu darsaday mudada lagu ballamay.
Wuxuu sheegay in Xildhibaanada BFS ay aadi lahaayeen degaan doorashooyinkooda si ay ugu qeyb qaataan Howlaha gurmadka balse ay u xayiran yihiin in marka hore la ansixiyo Xukuumada.
Cawad waxa uu tilmaamay inay muhiim tahay in la soo dadajiyo dhismaha Xukuumada isla markaana arrintaasi Guddoonka Baarlamaanka uu kala hadlay Madaxweynaha iyo Ra’isal wasaaraha.
Waxa uu sheegay in Guddoonka Golaha Shacabka uu ahmiyad gaara u arko in lasoo dadajiyo Golaha waxa uuna cadeeyay inay dayacan yihiin howlo farabadan oo ku xiran magacaabida Golaha Wasiirada.
Dhinaca kale, Cawad ayaa ku baaqay in Golaha Wasiirada ee la magacaabi doono ay noqdaan kuwo ka tayo badan kuwii hore.
Caasimada Online
Xafiiska Muqdisho
[email protected]