Muqdisho (Caasimada Online) – Siihayaha Wasiirka Arrimaha Dibadda Somalia,Cabdisalam Hadliye Cumar ayaa ka hadlay farqiga u dhexeeya Golihii hore Wasiirada iyo Golaha cusub ee Xukuumada Somalia.
Hadliye ayaa sheegay inuu farqi u dhexeeyo labada Gole waxa uuna cadeeyay in Wasiiradii uu soo magacaabay Cumar C/rashiid ay ahaayen kuwo aan laheyn Siyaasad fog.
Hadliye wuxuu sheegay waxa kaliya ee xukuumadii hore uga duwan tahay Wasiirrada cusub inay tahay xaga tayada, asagoo marka soo qaatay doorka ay haweenka ku leeyihiin xukuumadda iyo dadka la magacaabay.
”Labada Xukuumadood waxaa tayo badan kuwa cusub waayo Xukuumadii Sharmaarke waxaa ku yaraa Haweenka halka Xukuumada Kheyre ay ku badan yihiin Haweenka”
”Farqiga u dhexeeya waxaa kamid ah in Xukuumada cusub ay u badan yihiin Wasiiro aragti fog u leh Siyaasada isla markaana lagu soo xulay aqoonta ay u leeyihiin Wasaaradaha loo magacaabay, waxaan sidaa darteed oranayaa waxaa tayo badan Wasiirada cusub”
Hadliye oo ah Siihayaha Wasaarada Arrimaha Dibadda Somalia ayaa tilmaamay in Wasiir waliba uu mari doono caqabado gaara waxa uuna sheegay inay adkaan doonto la qabsiga Howlaha.
Ra’isul wasaare Xasan Cali Kheyre ayaa doraad magacaabay gole Wasiirro oo ka kooban hal Ra’isul wasaare ku-xigeen oo loo magacaabay Mahdi Axmed Guuleed (Khadar) 26 wasiir, 26 wasiir ku xigeen, iyo 15 wasiiru dowle.
Caasimada Online
Xafiiska Muqdisho
Caasimada@live.com
