Muqdisho (Caasimada Online) – Weerarkii shalay ay kooxda Al-Shabaab ku qaaday deegaanka Daaru-Nicma ayaa waxa uu banaanka usoo saaray saameynta uu durba dagaalka socday uu ku yeeshay isbeddelka lagu sameeyay taliyeyaasha ciidanka.
Dhawaan ayay aheyd markii dowladda federaalka ay isbeddel ku sameysay taliyaha ciidanka xoogga dalka iyo taliyaha ciidanka lugta ee Soomaaliya, ayada oo taliyeyaasha cusub ay xilka la wareegeen.
Taliyihii Ciidanka Lugta Jeneraal Biixi ayaa lagu beddelay Jeneraal Axmed Aadan Cali, halka Taliyihii ciidanka xoogga Jeneraal Odowaa ayaa sidoo kale waxa lagu beddelay Jeneraal Ibraahim Sheekh Muxiyadiin.
Isbeddelkaan ayaa keenay in dib u dhac ku yimaado howl-galadii ciidanka dowladda, xilli uu dalka ku jiro xaalad dagaal oo ka dhan ah kooxda Al-Shabaab, oo wejigii hore ee dagaalka looga xoreeyay deegaano horleh oo sanado badan gacantooda ku jiray.
Taliyaha ciidanka Macawiisley ee ka dagaalama deegaanka Daaru-Nicma Cabdi Taakow Qodaxow oo la hadlay VOA ayaa arrintaan ka dhawaajiyay, taasi oo kooxda Al-Shabaab ay durba ka dhex aragtay fursad ay ku sameyn karto rogaal celin.
Cabdi Taakow ayaa waxa uu sheegay in isbeddelka saraakiisha sare ee taliska xoogga iyo munaasabadaha xorriyada iyo ciida ay saameeyeen dhaq-dhaqaaqii ciidan ee aagaas ay ka waday dowladdu.
“Waxaa jira kala guur, oo waa tii la bedelay taliyeyaasha iyo hoggaanadii ciidamada, taliyihii xoogga iyo taliyihii lugta. Waxaa lagu jira maalmihi xoriyada iyo ciiddo, sidaas darteed waqtigii loogu tala-galay in ciidanka xoogga dalka inay deegaankaas iyo deegaanada lamidka ah ee degmada Ruun-nirgood ay soo gaaraan ayaa dib u dhac ku yimid,” ayuu yiri Taliye Cabdi Taakow.
Waxa uu intaas kusii daray “Shabaab-ka waxay iyaguna ka faa’iideysteen inta ciidamo dowlad deegaanka soo gaarin inay waxay boobi karaan ama dafi karaan dafaan.”
Si kastaba, dowladda federaalka iyo taliska cusub ee ciidanka ayaa waxaa xilligaan la gudboon inay meesha ka saaraan gaabka ku yimid howl-galada iyo dhaq-dhaqaaqii ciidanka, si aysan markale fursad ugu noqon kooxda Al-Shabaab, sida ay qabaan khubarada amniga.
