Muqdisho (Caasimada Online) – Odayaasha beelaha Hawiye ayaa maanta kulan ay Muqdisho ku yeesheen uga hadlay xaaladda magaalada Muqdisho iyo go’doonka ay dowladda gelisay magaalada.
Kulankan, oo aan horraantii toddobaadkan sheegnay inuu dhacayo, ayaa maanta qabsoomay kadib markii dowladda ay ku fashilantay isku day ay ku baajin lahayd, ayada oo adeegsaneysa siyaasiyiin Hawiye ah oo mushaari ka ah dowladda.
Suldaan Yuusuf Cabdi Cali oo kulanka ka hadlay ayaa sheegay in Muqdisho ay kacday, islamarkaana ay ka cabaneyso go’doonka ay muddada sanadka ah ku jirto oo dowladda ay saartay.
Waxa uu sheegay in shacabka Muqdisho la ciqaabayo oo dowladda ay ku ciqaabyeso ayada oo ku andacooneysa inay sugeyso amni, balse aysan weli sugin amnigii oo qaraxyada ay socdaan.
Nabaddoon Cabdulqaadir Maxamuud Maxamed Abaabul oo ka hadlay kulanka ayaa sheegay in shacabka Muqdisho aysan qaban in haweenkooda ay ku dhalaan Mooto Bajaaj iyo in baabuurtii ganacsiga lagu qasbay inay socdaan habeen kaliya.
“Waxa socda waxaan u aragnaa arrin lagu beegsanayo hantida dad gaar ah, haddii dowladda u qabto inaan hurudno ha ogaato, waan soo jeednaa ayuu yiri
Wabar Socdaal Raage oo isna ka hadlay kulanka ayaa sheegay in xitaa Muqdisho laga xanibay khudaartii soo geli jirtay oo magaalada banaankeeda lagu xanibay.
Wabar ayaa sheegay in dadka Muqdisho lagu hayo ciqaab ay ku hayaan dadka hoggaamiya dowladda, oo uu sheegay inay fashilmeen.
Hoos ka dhageyso codadka odayaasha
Caasimada Online
Xafiiska Muqdisho
caasimada@live.com
