Tokyo (Caasimada Online)-Madaxweynaha Soomaaliya Mudane Xasan Sheekh Maxamuud oo maalntii labaad booqasho rasmi ah ku jooga dalka Japan ayaa maanta oo Arbaca ah booqday goobo muhiim ah oo ku yaalla dalkaas.
Madaxweynaha iyo wafdiga la socda ayaa goobaha ay booqdeen waxaa ka mid ah dekadda Yokohama iyo xarunta ciidamadda ilaalada xeebaha dalka Japan.
Madaxweynaha iyo wafdigiisa ayaa warbixin ku aadan qaabka loo tababbarro ciidamada iyo sidda u howlgasho xarunta ka dhageestay saraakiisha ciidamada ilaalada xeebaha dalka Japan.
Sidoo kale madaxweynaha iyo wafdigiisa waxa ay booqdeen xarunta Hey’ada Japan u qaabilsan Badaha ( Nippon Foundation) isla-markaana kulan la qaatay Madaxda Hey’ada.
Madaxweynaha oo markii uu soo dhammeestayu saxaafadda la hadlay ayaa yiri “Waxaan hordhignay Japan Qorshe Guud oo faahfaahsan ee dib-u-dhiska Somalia. Soomaalia waxay leedahay xeebta ugu dheer Qaaradda Afrika waa ineynu baranaa sidii aanu uga faa’iideysan lahayn iyo sidii aanu u difaacan lahayn”.
Ugu dambeyntii, madaxweynaha iyo wafdiga la socda ayaa caawa loo sameeyey casho sharaf ay ka qeyb galeen, wakiilka dowladda Japan u qaabilsan wadamadda Afrika, xildhibaanno ka socday dalka Japan iyo mas’uuliyiin ka tirsan wasaaradda arrimaha dibadda ee dalka Japan.
Caasimada Online
Xafiiska Wararka Tokyo
Caasimada@live.com