Taliska ciidanka Booliska Somaaliyeed ayaa sheegay in ay dib u howlgeliyeen nambarkii Oto oto ama 888 ee la wici jiray marka ay xaalad degdeg ah jirto.
Taliyaha booliska Soomaliyeed jeneraal Cabdixakiim Daahir Saciid ayaa sheegay in uu nambarka dadka ka caawin karo wargelinta booliska marka ay arkaan falal halis ah, qaraxyo, dab kacay, shil, xanuun degdeg ah oo ku soo booday qof iyo falal la xiriira amni-darro.
Jeneraal Saacid waxaa uu sidoo kale sheegay in ay sameeyeen gaadiidka gurmadka degdegga ah iyo qol isku xira telefoonnada, raadiyeyaasha iyo ciidamada marka ay timaado xaalad degdeg ah.
Wuxuu ka codsaday bulshada ku nool Muqdisho in ay soo wacaan nambarka 888 marka ay arkaan waxyaabo amniga wax u dhimaya, isla markaana ay la shaqeeyaan booliska iyo ciidamada amniga.
Nambar 888 wuxuu ka mid yahay adeegyadii booliska ee ku burburay dagaalladii sokeeye ee dalka ka dhacay.