Muqdisho (Caasimada Online) – Xidlhibaano ka tirsan Golaha Shacabka ayaa maanta mooshin cusub u gudbiyay guddoonka sare ee Golaha, kaas oo ay ku dalbanayaan in ajendaha lagu soo daro ka doodista hindise sharciyeedka hantidhowraha guud ee qaranka.
Guddoomiyaha Baarlamaanka, Sheekh Aadan Maxamed Nuur (Aadan Madoobe) oo guddoomiyay kulankii maanta oo ahaa mid wadajir ah oo ay yeesheen labada Gole ayaa shaaca ka qaaday inuu soo gaaray mooshinkaas oo ay gudbiyeen illaa 10 xildhibaano.
“Waxaan rabaa inaan idin xusuusiyo inuu yaallo mooshin u gaar ah Golaha Shacabka oo xildhibaano ay soo gudbiyeen oo ku saabsan in ajendaha lagu daro sharcigii hantidhowraha” ayuu yiri guddoomiyaha Golaha Shacabka ee Baarlamaanka Soomaaliya.
Sidoo kale wuxuu ka dalbaday xildhibaanada in dib loo dhigo dooda mooshikan, maadaama kulanka maanta ay goobjoog ahaayeen senatorada Golaha Aqalka Sare, mooshinkaana uu gaar u yahay xildhibaanada Golaha Shacabka Soomaaliya.
“Marka xildhibaanada Golaha Shacabka si gaar ah waxaan uga codsaneynaa in marka hore aan galno ajendaha wadajirka ah ee hadda noo yaallo, kadibna aan cod u qaadno soo jeedinta xildhibaanada mooshinka keenay” ayuu mar kale yiri Sheekh Aadan Madoobe.
Kulanka wadajirka ah ee ay maanta ku yeesheen xildhibaanada labada gole xarunta Villa Hargeysa ayaa ajendihiisa wuxuu ahaa akhrinta koowaad ee miisaaniyadda sanadkan 2023-ka, waxaana Golaha hortegay wasiirka cusub ee maaliyadda, Biiixi Iimaan Cige.
Maalmihii u dambeeyay Baarlamaanka ayaa la daala dhacayay mooshino iyo doodo xoogan oo hareeyay kulamada baarlamaanka, waxaana u dambeeyay buuq ka dhashay kulankoodii 6-aad ee Kafadhigga 3-aad, kaas oo la horgeeyay mooshin deg deg ah oo ay keeneen 30 mudane oo ka tirsan Golaha Shacabka.
Mooshinkaas oo isna loo gudbiyay Afhayeenka Baarlamaanka Sheekh Aadan Madoobe ayaa ku saabsanaa in ajendaha kulanka maanta lagu kordhiyo mooshin ku aadan la xisaabtanka iyo habsami u socodka howlaha Golaha Shacabka ee Baarlamaanka Federaalka Soomaaliya.
