Kabtanaka kooxda Liverpool Steven Gerrard ayaa qirtay in baahidiisa ah inuu Reds ku hugaamiyo Premier League inta uusan soo afjarin xirfadiisa kubada cagta ay tahay wax mucjiso ku dhici doona.

Liverpool ayaa ku dhameysatay kaalinta labaad ee horyaalka England sedax sano ka hor markaasoo ay aruursatay 86 dhibcood waxayna ku guuleysteen koobab kale, laakiin Gerrard ayaa door bidaya inuu mar uun kooxda ku hugaamiyo EPL.

Laba Manchester iyo Chelsea ayaa ah kooxaha ugu  hardanka adag Horyaalka, 32 jirkaan ayaana arka in hadii uu keeno horyaalka gobolka Merseyside ay ahaan laheyd wax mucjiso ku dhaca, isagoo si gaar ah u eegaya baahida looga qabo guul uu ka gaaro England.

“Waxay noqon doontaa mucjiso hadii aan hada ka hadlo dareenkeyga ku aadan horyaal aan kula guuleysto Liverpool,” ayuu yiri Kabtan Fantastic oo dhowaan la hadlaayey barnaamijka My Liverpool Story.

“Saas ayaan dhahayaa sababtoo ah da’adeyda iyo halka aan ku dhameysaneynay sanadihii lasoo dhaafay. Iyo sidoo kale xaalad xafiiltan oo jirta.

“Hada keliya maahan United iyo Arsenal laakiin City, Chelsea iyo Tottenham. Newcastle ayaa ah kuwo si wanaagsan u ciyaara. Horyaalka Premier League aad ayey u adag tahay inay ku guuleysato koox walba.”

Waxaa lasoo werinayaa in Manchester United ay ku dhowdahay inay 6 milyan oo ginni kula soo wareeto xidiga kooxda Blackpool Thomas Ince.

Sir Alex Ferguson ayaa doonaya inuu ciyaaryahankaan qadka dhexe marsiiyo wado uu horay u maray aabihii Paul uuna usoo dhaqaajiyo gegeda Old Trafford.

Ince ayaa sanadii hore Blackpool uga soo biiray kooxda Liverpool wuxuuna tayadiisa kusoo bandhigay horyaalka heerka labaad ee Ingiriiska Championship.

20 jirkaan ayaa diirada u saarnaa intii uu furnaa suuqa kala iibsiga ciyaartoydu kooxda Swansea laakiin wuxuu nagi ku ahaa Tangerines, kuwaasoo 3-0 sabtidii ku lumiyey kooxda Cardiff.

United, ayaa si kastaba ha ahaatee, dooneysa inay xidigaan soo kaxeysato, sida uu werinaayo wargeyska England kasoo baxa ee Sunday Express.

Xidigaan ayaa yiri bishii lasoo dhaafay: “Xiisaha la ii qabo waa mid I tusinaaya inaan sameynaayo wax yaabo fiican.

“Laakiin tan keliya ee aan ku saxnaa ayaa aheyd inaan imid Blackpool sababtoo ah waxay I tusiyeen xiisahooda daaacadnimada ku dhisan.

“Wey I caawiyaan sababtoo ah ciyaaryahanku waa aniga.”