Garoowe (Caasimada Online)-Dowlada Federaalka Somalia ayaa gudaha Asbuucaani dhaqaale xoogan ku wareejisay maamulka Puntland taa oo loogu tallo galay Abaaraha ka jira deegaanada maamulka.
Maamulka Puntland ayaa la cagahaani durba u adeegsaday qaabab aan loogu tallo galin waxaana la xaqiijiyay in lagu iibiyay gaadiid xili dadka ay saameeyen abaaruhu ay la liitaan Cuno la’aan iyo Xanuuno ka dhashay abaarta.
Hogaamiye ku-xigeenka maamulka Puntland Cabdixakiin Cabdulaahi Xaaji Cumar ”Camay” oo goordhow saxaafada kula hadlay Magaalada Garoowe ayaa sheegay in dhaqaalaha ay ka gudoomeen DFS ay tahay $150,000 oo dollar.
Cameey ayaa sheegay in dhaqaalaha ay ka gudoomeen DFS lagu iibiyay 6 gaari oo uu sheegay in loogu adeegi doono dadka ay lasoo daristay abaarta.
Cameey ayaa sidoo kale, sheegay in gaadiidkaasi 6-da ah dhawaan lagu xiri doono taarigada dowladda islamarkaana ay si deg deg ah uga howlgali doonaan deegaanada ay saameeyen abaaraha, isagoo tilmaamay in shaqadooda ay noqon doonto biyo dhaamin, sida uu hadalka u dhigay.
Dadka ku dhaqan deegaanada ay saameeyen abaaraha ayaa xiligaani u baahan helida raashiin iyo Caafimaad, waxa ayna tani mugdi galineysaa in maamulka uu ka dhabeynaayo axdigii ay wada galeen Dowlada kaa oo ahaa in lagu iibin doono Raashiin.
Dhinaca kale, Dowlada Somalia ayaa dhaqaale kaa lamid ah u qeybisay maamul Goboleedyada dalka taa oo qeyb ka ah gurmadka loo fidinaayo dadka Soomaaliyeed ee ay abaaruhu saameeyeen.
Caasimada Online
Xafiiska Garoowe
[email protected]