London (Caasimada Online) – Ra’iisul Wasaaraha Boqortooyada Midowday ee UK, Keir Starmer, ayaa ku dhawaaqay Isniinta maanta inuu xilka ka tegi doono sidoo kalena hoggaanka xisbiga Shaqaalaha (Labour) iyo xilka ra’iisul wasaarenimo, taasoo soo afjaraysa jahawareer siyaasadeed, isla markaana furaysa tartan lagu beddelayo siyaasadda xiligaan ee UK..
Go’aankan ayaa ka dhashay cadaadis xooggan oo saarnaa ra’iisul wasaaraha, kadib markii xisbiga Labour uu khasaare xoogan kala kulmay doorashooyinkii deegaanka ee dhacay bishii May, iyo waliba mucaaradad sii kordhaysa oo uu kala kulmayay xildhibaannada xisbigisa oo ka horyimid hoggaankiisa iyo qorshe-siyaasadeedkiisa.
Tallaabadan ayaa timid iyadoo ay ka yar tahay labo sano ka dib markii Starmer uu xisbiga Labour u horseeday mid ka mid ah aqlabiyaddii ugu weynayd ee baarlamaaniga ah ee ay helaan doorashadii guud ee 2024.
Haddal uu ka jeediyay banaanka aqalka looga arrimiyo dalka ee 10 Downing Street ayuu Starmer wuxuu ku sheegay inuu xilka sii hayn doono ilaa inta uu ka dhammaanayo tartanka hoggaanka, taasoo uu sheegay inay gacan ka geysan doonto xil-wareejin nidaamsan.
Duqii hore ee magaalada Greater Manchester ee xisbiga Labour, Andy Burnham, ayaa guul weyn ka soo hooyay doorasho gaar ah oo dhacday 18-kii June, taasoo laga yaabo inay waddada u xaarto inuu u tartamo hoggaanka xisbiga iyo xilka ra’iisul wasaaraha UK.
Ra’iisul wasaaare Starmer wuxuu sheegay in gelitaanka 10 Downing Street ay ahayd daqiiqaddii ugu sharafta badnayd noloshiisa, isagoo intaa raaciyay in muddadii uu xafiiska joogay dib loo soo celiyay sumcaddii Britain ee caalamka, la xaqiijiyay maalgashi, lana horumariyay xuquuqda shaqaalaha.
Si kastaba ha ahaatee, Starmer wuxuu qirtay in xubnaha kale ee xisbiga Labour ay tan iyo markaas weydiinayeen inuu yahay qofka ugu habboon ee xisbiga ku hoggaamin kara doorashada guud ee soo socota.
Ku dhawaaqista iscasilaada Starmer kadib Lacagta Pound-ka ayaa la arkayay iyadoo 0.19% hoos ugu dhacday lacagta Dollar-ka, iyadoo lagu kala iibsanayay qiimo aad u jaban.
Si kastaba ha ahaatee, ra’iisul wasaare Starmer wuxuu dhowaanahan aad u danaynayay inuu dejiyo suuqyada, isagoo iska fogeeyay hadalladii hore ee uu ku sheegay in UK ay “ku xiran tahay suuqyada dammaanadda.
UK ayaa mudo afar sano ah xilalka isaga kala danbeeyeen afar ra’iisul wasaare cusub, haddii xilka uu banneeyana Mr Starmer waxaa xafiiska imaan doono kii shanaad muddo afar sano ah, iyadoo la magacaabi doono gole wasiirro oo dejin doona barnaamij siyaasadeed oo cusub.