Nairobi (Caasimada Online)-Madaxweynaha Mareykanka Donald Trump ayaa booqasho ku tegay magaalada Tel Aviv ee dalka Israel kaddib booqasho labo maalmood ah oo uu ku tegay dalka Sacuudiga oo ay xulafo dhaw yihiin Mareykanka.
Donald Trump, ayaa waxaa magaalada Tel Aviv kusoo dhaweeyay madax farabadan oo xilal kala duwan ka haya maamulka Israel.
Ra’iisul Wasaaraha Israel Benjamin Netanyahu iyo madaxweyne Reuven Rivlin ayaa ka mid ah kuwa kasoo qeyb galay xafladdii soo dhoweynta ee Trump loogu sameeyey garoonka diyaaradaha Ben-Gurion Airport.
Warbaahinta dalka Mareykanka ayaa baahisay in Donald Trump, uu doonaayo inuu dib usoo nooleeyo dadaallada heshiiska nabadeed ee muddo loo raadinayo Israel iyo Falastiin.
Waxa ay baahisay in Donald Trump uu magaalada Tel Aviv kula kulmi doono xubno ka tirsan maamulka Falastiin kuwaa oo u janjeera dhanka Israel.
Xubnaha Falastiiniinta ee uu kula kulmi doono magaalada Tel Aviv ee dalka Israel, ayuu kala hadli doonaa sida ay u xasilin lahaayen xiisada Siyaasadeed, waxaana suuragal ah inuu kala hadlo inay la shaqeeyan Israel si loo qaboojiyo xiisada jirta.
Madaxweynaha Mareykanka ayaa waxaan uu booqan doonaa Darbiga Galbeed, oo ah halka ugu barakeysan diinta Yahuuda.
