Sawirro: Puntland & Axmed Madoobe oo soo saaray go’aano ku socda DFS

By Asad Cabdullahi Mataan

Kismaayo (Caasimada Online) – Maamulka Puntland iyo kooxda Axmed Madoobe ee Jubba ayaa maanta markii ugu horreeysay soo saaray war ay si wada jir ah ugu hadlayan arrimo badan oo quseeya xaaladda xilligaan ka jirta dalka.

Waxaa ay farrin u direen dowladda faderaalka ah ee Soomaaliya, iyagoona usoo jeediyey ina dowladdu ay qeybtooda ka soo garsiiso deeqaha caalamka laga helay ee gacmaha dowladda ku soo dhaca.

War-saxaafadedkan oo ka soo baxay magaalada Kismaayo ayaa waxaa ku sugan wafti wasiirro ah oo ka socda Puntland, waxaana ay kulamo la qaaten madaxda maamulka Jubba iyo bulshada qeybaheeda.

Hoos ka akhriso war-saxaafedka ka soo baxay Puntland iyo Jubba:;

Waxaa magaaladda Kismaayo ee xarunta Maamulka Kumeelgaarka ah ee Jubba soo gaaray maalinimadii Talaadada ee 24kii June 2014 wafdi ka socda Dowladda Puntland ee Soomaaliya oo ka kooban Wasiiro iyo Xildhibaanno. Ujeedka socdaalka wafdiga Puntland wuxuu ahaa wada tashi iyo xoojinta iskaashiga 2da maamul iyo isxog dhaafsi guud ahaan xaaladda Soomaaliya.

Gorfeyn dheer kadib, waxaa labada dhinac kulamadaasi si wada jir ah uga soo saareen warsaxaafadeedkaan:

In Soomaaliya ay tahay Jamhuuriyad Federaal ah sida uu qabo Qodobka 1aad ee Dastuurka. Hadaba iyadoo arrintaan la fulinayo, waxaaa waajib ku ah Dowladda Federaalka ah inay dardargaliso hirgalinta nidaamkaas ay Soomaaliya isku raacday, waafaqsanna Dastuurka gundhigga u ah Soomaaliyada cusub ee lagu wada heshiiyay Qodobkiisa 51aad.

Puntland iyo Maamulka Jubba waxay aaminsanyihiin muhiimadda iyo sida lagama maarmaan u tahay dhamaystirka iyo iyo dhaqangalinta Dastuurkii lagu heshiiyay. Hadaba si taa loo gaaro, waxaa xilka wada saaranyahay Dowladda Federaaliga ah iyo Dowladaha xubnaha ka ah inay si wadajir iyo iskaashi leh uga wada xaajoodaan dhamaystirka Dastuurka iyo hirgalintiisa.

Sidoo kale waxaan aaminsanahay in habraac walba oo lagu dhamaystirayo / fulinayo Dastuurka lagala tashado dowladaha xubnaha ah sida uu qabo Dastuurku. Wixii waxkabadal ah ee lagu sameeyay Dastuurkii lagu heshiiyay oo aan waafaqsanayn isla Dastuurka cutubka 15aad iyo Jadwalka A&B ee ka hadlaya habraaca waxkabadalka Dastuurka waxaan u aragnaa sharci darro.

Maamulka Jubba iyo Puntland waxay soo dhowaynayaan dhismaha maamul u samaynta 3da Gobol ee Baay, Bakool iyo Shabeelada Hoose waxayna la garab taaganyihiin wax walba oo taageero ah. Waxaan kaloo aaminsannahay sida uu qabo Dastuurku in deegaanada aan lahayn maamul-dowladeed guud ahaan lagu taageero dhismaha maamul-dowladeed, dowladda Federal kuna dardar galiso wixii fududayn iyo farsamo ah.

Labada dhinac waxay aaminsanyihiin inay xaq uleeyihiin inay ka helaan qaybtooda Deeqaha Caalamiga ee magaca Soomaaliya lagu helo waana inay Dowladda Federaalku u qaybisaa deeqahaas si caddaalad ah.

Labada maamul waxay aaminsanyihiin in doorashada 2016 ay ku dhacdo xilligii iyo qaabkii loogu talo galay sida uu qabo Dastuurku. Haddii qaabka qabashadeeda isbadal loo baahdo in lagu sameeyo, waa in si wadajir ah uga wada tashadaan Dowladda Federaalka iyo Dowladaha xubnaha ah.

Labada maamul, waxay ku heshiiyeen in ay is dhaafsadaan wixii aqoon iyo khibrad waayo aragnimo ah iyo waliba in ay labada dhinac wadaagaan xogaha amniga iyo argagixisada caalamiga ah si la iskaga kaashado ladagaalankooda, soo afjaristooda iyo maamul wanaaga ay higsanayso Umamadayada Soomaaliyeed, si loo gaaro Dimoqraadiyad dhab ah iyo nabad waarta oo Soomaali ku wada noolaato kulana noolaato Dowladaha dariska la ah.

fowdo 1fowdo 2fowdo 3fowdo 4

 Caasimada Online

Xafiiska Kismaayo

Caasimada Online