Muqdisho (Caasimada Online) Xildhibaan Shariif Xasan Sheekh Aadan oo horrey labo jeer u soo qabtay xilka guddoomiyaha baarlamaanka Soomaaliya, ayaa maanta oo Sabti ah dib ugu soo laabtay magaalada Muqdisho ee caasimada Soomaaliya.
Shariif Xasan oo tan iyo markii la doortay madaxwaynaha Soomaaliya Xasan Sheekh Maxamuud bishii September uu dalka ka tagay ayaa ku maqnaa sarafo dibedda ah.
Wasiiro, wasiiro hore, Xildhibaanno, odayaal, haween iyo saxaafadda ayaa ku soo dhaweeyay garoonka diyaaradaha Aadan Cadde oo ku soo daggay 2-dii duhurnimo ee maanta, waxana markii uu ka soo dagay garoonka uu mid-mid u gacan qaaday dadkii soo dhaweeyay, kaddibna waxa lagu qaaday baabuur la ii sheegay in uu isaga lee yahay, laakin la mid ah baabuurta madaxda dalka lagu galbiyo.
Waxa loo qaaday guriga uu ka dagan-yahay nawaaxiga Villa Somalia, waxana uu markii dambe sheegay in uusan saxaafadda al hadli karin maadama uu daalan yahay, sida ay saxaafadda u sheegeen saraakiil isaga soo dhaweeyay.
Immaashiyaha Shariif Xasan Sheekh Aadan saaka si wayn ayaa looga hadal hayay magaalada Muqdisho, waxana garoonka sii tagay dad u badan taageerayaashiisa.
Waxa la ii sheegay inuu isla berri aadi doono magaalada Baydhabo ee xarunta gobalka Baay, halkaasoo la sheegay in uu kaga dhawaaqi doono maamul gobaleed lamagac baxay (KOONFUR GALBEED).
Shariif Xasan Sheekh Aadan waa siyaasi si wayn u yaqaana siyaasadda Soomaaliya, mana la ogo wax yaabaha uu u yimid magaalada Muqdisho.
Kama qaybgalin fadhiyada baarlamaanka, isaga iyo ra’iisal wasaarihii hore Cabdiweli Maxamed Cali oo isna ah mudane ka tirsan baarlamaanka Soomaaliya.
Caasimada Online
Xafiiska Wararka Muqdisho
