New York (Caasimada Online) – Soomaaliya oo ka mid ah dalalka A+ ee Afrika ku matala Golaha Ammaanka ee Qaramada Midoobay ayaa ka hadlay xaaladda ka taagan dalka Venezuela, kaddib markii la xiray madaxweynihii dalkaas iyo xaaskiisa, kuwaas oo hadda ku xiran dalka Mareykanka.
Dalalka A+ oo ay xubno ka yihiin Soomaaliya, Jamhuuriyadda Dimuqraadiga ah ee Koongo iyo Liberia ayaa muujiyey walaac ku aaddan waxa ka socda Venezuela, iyaga oo carrabka ku adkeeyey muhiimadda ay leedahay in la dhowro shuruucda caalamiga ah ee qeexaya madax-bannaanida dalalka.
Danjiraha Liberia ee Golaha Ammaanka, oo ku hadlayay magaca dalalka A+ ee ay Soomaaliya iyo Koongo ka midka yihiin ayaa dhinacyada ku boorriyey in ay doortaan wada-hadal, isla markaana laga fogaado tallaabo kasta oo keeni karta gacan ka hadal.
“Arrinta ugu muhiimsan waa in si buuxda loo ixtiraamaa madaxbannaanida dalalka iyo faragelin la’aanta arrimahooda gudaha, si loo ilaaliyo nidaamka iyo sharciga caalamiga ah,” ayuu yiri Danjiraha Liberia.
Dalalka A+ ayaa sidoo kale ugu baaqay in la ilaaliyo xasilloonida siyaasadeed iyo badbaadada shacabka Venezuela, iyaga oo dhiirrigeliyey in xal dhexdhexaadin ah laga gaaro khilaafka u dhexeeya Mareykanka iyo dowladda Venezuela.
Madaxweynihii la xiray ee Nicolás Maduro iyo xaaskiisa ayaa kasoo hor muuqday maxkamadda New York, halkaas oo ay wajahayaan dacwado la xiriira ka ganacsiga daroogada iyo wiiqidda nidaamka dimuqraadiyadeed.
Maduro oo Mareykanka kusoo qabtay weerar ay ciidamadiisa gaarka ah ka fuliyeen gudaha Venezuela ayaa maxkamada New York u sheegay inuu weli yahay hogaamiyaha Venezuela.
“Ma ihi wax dambi ah. Ma ihi dambiile. Waxaan ahay nin hufan, madaxweyne ka ah dalkayga,” ayuu ku yiri Maduro.