Taagerayaasha SNM & SSDF oo fuliyey balanqaadyadii ay la galeen xabashida‏

Asad Cabdullahi MataanBy Asad Cabdullahi Mataan

Labadan Jabhadood waa SNM iyo SSFD,Waxa ay ahaayeen Labadii Jabhadood ee ugu horeeyey ee u gala Mamulkii Xabashida si ay u ridaan Dowladdii markaasi jirtay ee Kacaanka,Waxa ayna Labadan Jabhadood fureen albaab halis ku ah Umadda Soomaaliyeed, Kaas oo aan la furin Iyaga hortood ilaa Maantana furan.Danbi qaran iga dheh.

Inkasta oo ay xaq u lahaayeen Siyaasiyiintii horkacaysay Labadan Jabhadood ee ahayd in ay ka dhiidhiyaan dulmigii iyo xaq daradii ay sameyn jirtay Xukuumaddii Kacaanka hadana waxa ay ahayd cali xumo iyo garasho la’aan in ay u galaan dowlad cadow ku ah dalka iyo dadka Soomaaliyeed, waayo waxay talaabadani keeneysay dhibaato ka weyn middi laga cabanayey,Waana middi uu qiray marar badan Cabdulaahi Yuusuf.

Inkastoo Dowladdii Kacaanku ay xaq u lahayd, in ay difaacdo dalka kana hortagto wax alaale iyo wixii dhibaato abuurayo, hadana ma ahayn in ay xoog u isticmaasho dadkeedii sidoo kalena ay burburiso Magaalooyinkii, waayo waxa ay ahayd in ay tanaasul la timaaddo Islamarkaana ay ogolaato in la wadaago talada Dalka, si looga hortago dagaallo sokeeyo iyo khilaafaad siyaasadeed laakiin nasiib daro taasi ma dhicin, Waxaana eeddaas iska leh raggii markaasi majaraha u hayey Dowladda markaasi jirtay sida Maxamed Siyaas Barre oo kale.

Waxa ay rabtaba ha noqotee,Waxa ay labadan Jabhadood iyo taageerayaashooduba u galeen Maamulkii Xabashida si ay ula dagaalaan Dowladdii Maxamed Siyaad Barre,Waxa ayna ugu danbeyn heleen Saldhigyo ciidan iyo qalab Militari intuba si ay u bilaabaan dagaalkoodii,Taasoo ugu danbeyn u suurtagashay in ay ridaan Dowladdii Soomaaliyeed Iyagoo adeegsanayo hubkii Xabashida.Waxaa Iyagana garab socday Labadan Jabhadood Jabhado kale sida SPM,USC iyo SDM.

Khaladaadkii iyo is fahamwaaagii u dhaxeeyey Siyaasiyiintii Soomaalida ee markaasi jirtay, Waxa ay fursad weyn (Golden Chance) ah u noqotay Maamulkii Xabashida oo halis ugu jiray in uu ku baxo gacantii Dowladdii Soomaaliyeed ee markaasi jirtay haddaysan u soo gurman Dowladdihii Shuuciga ahaa sida Ruushka oo kale,Waxaana daliil noogu filan dharbaaxidii ay Soomaalidu geysatay dagaalkii 77.

Maadaama aysan Xabshidu ku dhicin iskacaabinta dadka Soomaaliyeed Iyagoo mid ah sababa badan oo jira dartood,Waxa ay in mudda ahba raadin ugu jirtay sidii ay u heli lahayd Soomaali mucaarad ah si ay ugu adeegsato duminta Dowladdii xoogga badneyd walibana tayada fiicneyd laakiin nasiib daro, Waxa ay ugu danbeyn Xabashidu heshay Siyaasiyiin Mucaarad ah oo ay ugu horeeyeen Siilaanyo,Cabdullaahi Yuusuf iyo rag kale oo badan,Kuwaas oo dowrmuuqda ku lahaa dhismaha Labadan Maamul Goboleed ee kala ah Somaliland iyo Puntland. Balan la fuliyey dheh

Maadaama ay dunidu ku salaysan tahay waxa loo yaqaano give and take, Waxa ay Xabashidu kula heshiisay Labadan Jabhadood heshiisyo kala duwan siduu qiray Cabdulaahi Yuusuf mar uu u waramayey Tv Universal,Waxa uuna Cabdulaahi Yuusuf sheegay in ay Xabshidu la gashay heshiis qarsoodi ah Jabhaddii SNM,Kaas oo ujeedadiisu ahayd in ay goostaan gobolada Waqooyi marka ay qabsadaan deegaanadaasi.Waxa uuna heshiiskaasi ahaa heshiis laga qarinayey Saraakiishii SSDF-ta. hoos ka daawo wareysiga Cabdulahi Yuusuf.

Halkan ka daawo Wareysigii Universal Tv ay la yeesheen Cabdulahi Yuusuf

Siduu cadeeyey Cabdulaahi Yuusuf, Waxa ay dhowr jeer u bandhigeen Saraakiishii SNM in ay wada dhistaan urur weyn oo la dagaalamo Dowladdii Kacaanka laakiin taasi waxaa diiday islamarkaana ka horyimid Siyaasiyiintii SNM oo sheegay in ay saxaayaan khaladkii la galay 60, taas oo ay ula jeedeen Midnimaddii 60-kii.Marqaati kacaasi uu sameeyey Cabdulaahi Yuusuf, ayaa meesha ka saarayo hadalada ay Siyaasiyiinta reer Somaliland ku qaldaan ra’yi caamka dadka Soomaaliyeed.Markaan hadalka soo koobo, dhinaca Soomaalida oo ay horboodayeen Siyaasiyiintii SNM iyo SSDF, Waxa loo xilsaaray in ay ridaan Dowladdii Soomaaliyeed, Islamarkaana ay burburiyaan dalka siday sameeyeenba halka dhinaca Xabashidana loo xilsaaray bixinta taakuleynta iyo siyaasadda.Hadaba ma fuliyeen taageerayaashii SNM iyo SSDF balanqaadkii ay la galeen Xabashida markay qabsadeen deegaanadii ay ka soo jeedeen ?Jawaabtu waa haa waayo taageerayaasha SNM, waxa ay ku dhawaaqeen gooni-isutaag halka kuwa SSDF-na ay ku dhawaaqeen mudda ka dib waxa loo yaqaano Federaalism oo intuba ku soo biyo shubanayo hadafkii ay Xabshidu u taageereysay Jabhadahan oo ahaa inaanan mar danbe la helin dowlad Soomaaliyeed xoog leh,taasoo mar kale la loolanta Xabashida.Taageerayaasha Jabhadda SNM, Ayaa wali ku socda wadadii ay isku ogaayeen Xabashida ee ahayd kala dhantaalidda midnimada iyo wadajirka dalka, Iyagoo adeegsanayo farsamooyin lagu burburiyey wadamo mid ahaa sida Sudan oo kale,Waxa ayna u badan tahay in la aqoonsado Maamulka Somaliland Iyadoo laga faa’iideysanayo karti xumida iyo waayo aragnimo la’aanta haysata Kooxda maamusha Villa Soomaaliya.

Dhinaca Puntland markaan fiirino, Waxa ay ahaayeen kuwa muddaba is qarinayey waayo ma ahayn kuwa u cadeystay sida taageerayaasha SNM-ta oo kale laakiin waayadan danbe, waxa ay bilaabeen taageerayaasha SSDF gaar ahaan ninka madaxda ka ah Maamulkooda ee la yiraahdo Cabdiwali Gaas in uu u dhaqmo sida in uu madax ka yahay dal ka madax banaan Soomaaliya, waxaana tusaale noogu filan hadaladii iyo safaradii uu ku kala bixiyey dalalka Itoobiya,Yemen iyo Jabuuti.

Tusaale ahaan hadaad u fiirsato kalimaadka ay isticmaalaan Siyaasiyiinta Puntland marka ay ka hadlayaan Maamulkooda Markii hore waxa ay dhihi jireen Maamulka Puntland, Mudda ka dib, Waxaa la badal Maamulka Puntland, Waxaana lagu badalay Dowladda Puntland,Hadana waxaa la marayaa dalka Puntland iyo Qunsuliyado ayaan furaneynaa.Of course waxaa la fulinaya balanqaadkii Xabashida lala galay.

Inkastoo ay ka soo baxeen taageerayaasha SNM iyo SSDF balanqaadyadii ay la galeeen Xabashida dhowr iyo Labaatan Sano ka hor hadana wali waxaan kala cadeyn, Waxa ay sameyn doonaan taageerayaasha USC,SDM/RRA iyo SPM/RASKAANBOONI, kuwaas oo hadaba ay Shirar uga socdaan Magaalooyinka Baydhabo iyo Kismaayo,Waxaana jawaabta u deyn doonnaa Maalmaha iyo Sanadaha soo socda.

Hadaba haday cadeysteen taageerayaasha SNM-ta, Islamarkaana ay fuliyeen balanqaadkii ay la galeen Xabashida ee sababta u ahaa in la caawiyo, Maxay u cadeysan la’yihiin taageerayaasha SSDF-ta oo ay ugu dhawaaqi la’yihiin gooni-isutaag  ?.

Hadaba waxaan kula talinayaa taageerayaasha SSDF ee qiiqa isku qarinayo,Kuwaas oo aad mooddo inaanan la fahamsaneyn makriga ay u maleegayaan Umadda Soomaaliyeed talada soo socota:-

1-In aad cadeysataan sida Somaliland oo kale, kuna dhawaaqdaan in aad ka go’aysaan Soomaaliya inteeda kale si la idin caawiyo Islamarkaana aad u farxad gelisaan Xabashida iyo kuwa lugooyada ku hayo Umadda Soomaaliyeed.

W/Q: Abdullahi Ibrahim Cumar
Abdull2006@hotmail.com

Afeef: Aragtida qoraalkan waxa ay ku gaar tahay qofka ku saxiixan, kamana tarjumeyso tan Caasimada Online.

Caasimada Online, waa mareeg u furan qof kasta inuu ku gudbiyo ra’yigiisa saliimka ah. Kusoo dir qoraaladaada caasimada@live.com Mahadsanid