Washington (Caasimada Online) – Madaxweynaha Mareykanka Donald Trump ayaa xilka ka qaaday la-taliyihiisii amniga qaranka, Michael Waltz, kadib markii si tartiib tartiib ah uu u korayay khilaaf la xiriiray aragtiyaha siyaasadeed iyo cabsi laga muujiyay qaabkiisa madax-bannaan ee go’aan qaadashada.
Inkasta oo sababta ugu dambeysa ee xil ka qaadistu ay ahayd markii uu bishii Maarso weriye ku daray Group Signal App ah oo xasaasi ah, haddana ilo-wareedyo ku dhow Aqalka Cad ayaa sheegay in mowqifkiisa dagaal-doonnimo – gaar ahaan arrimaha Iran – iyo isku dhacyadiisa joogtada ah ee saraakiisha sare ay gacan weyn ka gaysteen go’aankaasi.
Waltz, oo horey uga tirsanaa cutubka khaaska ah ee ciidamada Mareykanka (Green Berets), ayaa si isa soo taraysa u khilaafayay aragtida Trump ee ku dhisan ka fogaanshaha faragelinta dibadda.
Khilaafku wuxuu sii xoogaystay kadib kulan bishii Febraayo uu Trump la yeeshay Ra’iisul Wasaaraha Israel Benjamin Netanyahu, halkaas oo Waltz lagu eedeeyay inuu si buuxda ula saftay Netanyahu oo u ololeynayay weerar milatari oo ka dhan ah Iran. Trump ayaa la sheegay inuu si weyn uga carooday markii uu ogaaday in Waltz uu si qarsoodi ah ula shaqeynayay Israa’iil iyadoo aysan jirin qorshe diblomaasiyadeed oo qeexan.
Xiisadda gudaha Aqalka Cad ayaa cirka isku shareertay iyadoo Madaxa Shaqaalaha Susie Wiles iyo saraakiil kale ay bilaabeen iney u arkaan Waltz inuusan la jaanqaadi karin ajandaha madaxweynaha.
Inkastoo Madaxweyne ku xigeen JD Vance uu isku dayay inuu difaaco Waltz – isagoo geeyay safar uu ku tagay Greenland isla markaana la kulansiiyay siyaasiyiin ra’yigiisa la wadaaga – haddana xaaladdiisu ma aysan xasilloonayn.
Dhacdadii Signal oo jebisay xeerarka isgaarsiinta ayaa u muuqatay tii ugu dambeysay ee kalsoonida wiiqday, inkasta oo mas’uuliyiin qaar ay ku doodayaan in barnaamijka Signal loo isticmaalayay wada-hadallo aan sir ahayn.
Xilkaas kadib, Madaxweyne Trump wuxuu Xoghayaha Arrimaha Dibadda Marco Rubio u magacaabay la-taliye ku-meel-gaar ah oo dhanka amniga qaranka ah. In kastoo Rubio uu kasoo jeedo garabka Jamhuuriga ee dhaqanka leh sida Waltz, haddana wuxuu muujiyay diyaar u ahaansho inuu la jaanqaado jihada cusub ee siyaasadeed ee Trump.
Magacaabistiisa ku-meel-gaarka ah ayaa loo arkaa mid muujinaysa in muhiimaddii Golaha Amniga Qaranka (NSC) ay sii yaraanayso, iyadoo Trump uu doorbidayo daacadnimo shaqsiyeed iyo isfahan toos ah halkii uu ka raaci lahaa nidaamka hay’adaha iyo wada-tashi ballaaran.
Trump ayaa si kastaba ha ahaatee u magacaabay Waltz inuu noqdo danjiraha Mareykanka ee Qaramada Midoobay, tallaabo sii haynaysa xil dowladeed laakiin ka fogaynaysa go’aan qaadashada siyaasadda arrimaha dibadda ee Aqalka Cad.
Tani waxay sidoo kale calaamad u tahay isbeddelka baaxadda leh ee uu Trump qorsheynayo inuu ku sameeyo xukuumaddiisa labaad – isagoo beddelaya saraakiil khibrad dheer u leh hay’adaha dowladda kuna beddelaya kuwa daacad u ah aragtidiisa, gaar ahaan marka laga hadlayo siyaasadda dibadda.
Go’aankan ayaa sidoo kale ka tarjumaya shakiga sii kordhaya ee uu Trump ka qabo doorka hay’adeed ee Golaha Amniga Qaranka. Mas’uuliyiin badan ayaa hadda u arka NSC inuu ka leexday doorkiisii ahaa xarunta go’aan qaadashada siyaasadda arrimaha dibadda, islamarkaana uu noqday aalad si toos ah ugu adeega madaxweynaha.
Qaabkii hore ee khubaro madaxbannaan ay hoggaamin jireen siyaasadda dibadda ayaa laga yaabaa inuusan ka shaqeyn doonin maamulka Trump, maadaama go’aamada muhiimka ah lagu ururinayo madaxweynaha laftiisa.
Inkasta oo markii hore loo arkayay in Waltz uu yahay doorasho la yaab leh sababo la xiriira mowqifkiisa dagaal-doonnimo, haddana wuxuu ahaa mid si buuxda u taageersanaa Trump, kana shaqeynayay sidii uu u fulin lahaa awaamiirta madaxweynaha.
Si kastaba ha ahaatee, aragtidiisa adag ee ka dhanka ah Ruushka iyo Iran marar badan ayay is khilaafeen istiraatiijiyadda xasilloon ee Trump uu doorbidayay. Tusaale ahaan, Trump wuxuu ku tiirsanaa saaxiibkiisa dhow Steve Witkoff si uu u wado wada-xaajoodyo qarsoodi ah oo la xiriira Tehran iyo Moscow.
Ugu dambeyn, ilo ku dhow Trump ayaa sheegay in go’aanka shaqo ka qaadista Waltz uu ahaa mid uu si shaqsi ah u gaaray madaxweynuhu, maadaama uu si isa soo taraysa u noqday la-taliyihiisa ugu sarreeya. Inkasta oo talooyin laga heli karo saraakiil kale, sarkaal sare ayaa sheegay: “Marka ay noqoto go’aanada waaweyn ee shaqaalaha, isagaa go’aamiya.”
Shaqo ka qaadista Waltz, isbeddelka hoggaamineed, iyo suurtagalnimada hoos u dhigidda kaalinta Golaha Amniga Qaranka waxay muujinayaan jihada cusub ee Trump – mid ku dhisan daacadnimo, ururinta go’aamada hal meel, iyo kalsooni buuxda oo uu ku qabo aragtidiisa shaqsiyeed, halkii laga adeegi lahaa habraacyadii maamulka ama aragtiyo kala duwan oo gudihiisa ah.
